ރަސްމާލެ ވޯޓާފްރޮންޓް މެރީނާ މަޝްރޫޢުގެ 10 އަހަރުގެ ތަރައްޤީގެ މުއްދަތުގައި ދައުލަތަށް 11 ބިލިއަން އެމެރިކާ ޑޮލަރަށް ވުރެ ބޮޑު އާމްދަނީއެއް ލިބޭނެ ކަމަށް ލަފާކުރެވޭ ކަމަށް ފިނޭންސް މިނިސްޓަރު ޙަސަން ޒަރީރު މިއަދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ އެ މަޝްރޫޢުން އެވެރެޖްކޮށް އަހަރަކު ގާތްގަނޑަކަށް 1.1 ބިލިއަން ޑޮލަރުގެ އާމްދަނީއެއް ދައުލަތަށް ވަންނާނެ ކަމަށެވެ. މިއީ ރާއްޖޭގައި ހިންގާ 179 ރިސޯޓާއި 16 ހޮޓަލާއި 920 ގެސްޓްހައުސް އަދި 165 ސަފާރީ އުޅަނދުން ލިބޭ ޖުމްލަ އާމްދަނީ ފަހަނައަޅައިދާ ވަރުގެ ބޮޑު ޢަދަދެއް ކަމަށް މިނިސްޓަރު ފާހަގަކުރެއްވިއެވެ.

ދައުލަތަށް އާމްދަނީ ވަންނާނީ ޓީޖީއެސްޓީގެ ސްޓޭންޑަޑް ރޭޓާއި މާސްޓާ ޑިވެލޮޕަރުގެ ފުރަތަމަ ވިއްކުމާއި ކުއްޔާ ގުޅޭ 10 ޕަސެންޓާއި ގަންނަ ފަރާތްތަކުން ފުރަތަމަ ގަތުމާއި ދެވަނަ ފަހަރު ބަދަލުކުރުމުގައި މުދަލުގެ އަގުގެ ހަތަރު ޕަސެންޓުންނެވެ. މި އެއްބަސްވުމުގެ ދަށުން އެއްވެސް ޓެކްސް ލުޔެއް ނުވަތަ ޑިއުޓީ އިސްތިސްނާއެއް ދީފައެއް ނުވެއެވެ. އަދި ސަރުކާރުން ލޯނެއް ނެގުމެއް ނުވަތަ ސޮވެރިން ގެރެންޓީއެއް ދިނުމެއް ވެސް ނެތްކަން މިނިސްޓަރު ވިދާޅުވިއެވެ.

އެއްބަސްވުމުގައި ބަޔާންކޮށްފައިވާ ގޮތުން ޕްރޮޕަޓީ ވިއްކައިގެން ލިބޭ ހުރިހާ ފައިސާއެއް ބެހެއްޓޭނީ ރާއްޖޭގެ އެސްކްރޯ އެކައުންޓެއްގައެވެ. އެ ފައިސާ ދޫކުރެވޭނީ އެއްބަސްވުމުގެ ހަމަތަކާ އެއްގޮތަށެވެ. ހަމައެހެންމެ މަޝްރޫޢުގެ ހުރިހާ ފައިސާގެ މުޢާމަލާތެއް ކުރަންޖެހެނީ ރާއްޖޭގެ ބޭންކުތައް މެދުވެރިކޮށެވެ.

500 ހެކްޓަރުގެ ބިމެއްގައި 20 ބިލިއަން ޑޮލަރުގެ މި ބިޔަ މަޝްރޫޢު ފީޒްތަކަކަށް ބަހާލައިގެން ގާތްގަނޑަކަށް 10 އަހަރުން ނިންމުމަށް ރޭވިފައިވެއެވެ. ގެދޮރާއި ހޮޓެލްތަކާއި ރިސޯޓާއި މެރީނާގެ އިތުރުން ފިހާރަތަކާއި އޮފީސް އިމާރާތްތަކާއި ތައުލީމީ އަދި ޞިއްޙީ ވަޞީލަތްތައް ހިމެނޭ ގޮތަށް ތަރައްޤީކުރާ މި މަޝްރޫޢު ފުރިހަމަވުމުން އަހަރަކު އެއް މިލިއަނަށް ވުރެ ގިނަ ފަތުރުވެރިން ޒިޔާރަތްކޮށް ފަތުރުވެރިކަމުގެ ދާއިރާއިން އެކަނި ވެސް ގާތްގަނޑަކަށް ދެ ބިލިއަން ޑޮލަރުގެ އާމްދަނީއެއް އިޤުތިޞާދަށް ވަންނާނެ ކަމަށް ލަފާކޮށްފައިވެއެވެ.

ރަސްމާލެ މަޝްރޫޢުއަކީ ރާއްޖޭގެ ތާރީޚުގައި ހިންގާ އެންމެ ބޮޑު އެއް މަޝްރޫޢުއެވެ.