ތިލަފުށީ ޕޯޓަކީ ރާއްޖޭގެ ވިޔަފާރި އާއި އިޤްތިޞާދީ ތަރައްޤީއާ އެންމެ ބޮޑަށް ގުޅިފައިވާ އެއް މަޝްރޫޢުކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި މިނިސްޓަރު ސަޢީދު ވިދާޅުވީ، މި މަޝްރޫޢުގެ ބޭނުމަކީ މާލޭ ވިޔަފާރި ބަނދަރުގެ ޙާލަތު ބަދަލުކޮށް މިހާރުގެ އިޤްތިޞާދީ ހަޤީޤަތްތަކާ ފައިހަމަވާ ފެންވަރަކަށް އެ ބަނދަރު ގެނައުން ކަމަށެވެ. އެ ބަނދަރު ފުރަތަމަ ޤާއިމުކުރި ފަހުން ގެނެވިފައި ހުރީ ވަރަށް ކުދި ބަދަލުތަކެއް ކަމަށާއި އެތައް އަހަރެއް ކުރިން ކަމާ ބެހޭ އިދާރާތަކުން މި ޚިޔާލު ގެންގުޅެމުން އައި ނަމަވެސް ބަނދަރުގެ ޙާލަތު އޮތީ ބަދަލެއް ނައިސްކަން މިނިސްޓަރު ވިދާޅުވިއެވެ.
ދުނިޔޭގެ މަސްރަޙަށް އަންނަ ބަދަލުތަކާއި އިޤްތިޞާދީ ގޮންޖެހުންތަކުގެ ތެރޭގައި ޤައުމު ނިކަމެތިވާން ދޫކޮށްލައިގެން ތިބެވެން ނެތް ކަމަށް ވެސް މިނިސްޓަރުގެ ޕޯސްޓްގައި ވަނީ ފާހަގަކުރައްވާފައެވެ.
ވެރިއެއްގެ ޒިންމާއަކީ ހުރަސްތަކާ ކުރިމަތިލައްވައި އިޚްލާޞްތެރި މަސައްކަތުން ޤައުމު އެ ޙާލަތުން ސަލާމަތް ކޮށްދެއްވުންކަން ފާހަގަކުރަމުން މިނިސްޓަރު ވިދާޅުވީ، މި މަޝްރޫޢަކީ ރައީސް ޑރ. މުޢިއްޒުގެ ސަރުކާރުން ޤައުމުގެ ބޮޑެތި މައްސަލަތައް ޙައްލުކުރުމަށް ކުރިއަށް ގެންދާ މަސައްކަތްތަކުގެ ތެރެއިން ހިންގާ މަޝްރޫޢެއް ކަމަށެވެ.
ތިލަފުށި ޕޯޓަކީ އަދުގެ ސަރުކާރުގެ އެންމެ މުހިންމު އިގްތިސާދީ މަޝްރޫޢުއަށް ވާއިރު، އެތަން ތަރައްޤީކުރާނީ ސީދާ ސައްތައިން ސައްތަ ދިވެހިންގެ ބާރުހިނގާ ތަނެއްގެ ގޮތުގައިކަން ރައީސުލްޖުމްހޫރިއްޔާ ޑރ.މުއިއްޒު ވަނީ ވިދާޅުވެފައެވެ. މި މަސައްކަތުގެ ފުރަތަމަ ފިޔަވަހީގެ މަސައްކަތް ކުރިއަށްދާއިރު، މި މަޝްރޫޢުއަށް ޖުމްލަ 250 މިލިއަން އާއި 255 މިލިއަން އެމެރިކާ ޑޮލަރުގެ އަދަދެއް ހަރަދުވާނޭކަމަށް ސަރުކާރުން ވަނީ ލަފާކޮށްފައެވެ.
Advertisement
This content is created and paid for by advertisers and does not involve Voice Journalists
