އޭނާގެ ކޯތާފަތް ވަނީ ހިކި، ވަޅުޖެހިފައެވެ. އަދި ހަންގަނޑު ވަނީ ކަށިތަކާ ތަތްވެ ހިފެހެއްޓިފައެވެ. ނަމަވެސް އެއިން އެއްކަމެއްވެސް އޭނާ ހެޔޮ ޢަމަލު ކުރުމަށް އޮތް ހުރަހަކަށް ނުވިއެވެ. އޭނާ ޤުރުއާން ކިޔަވަން އިންދާ ނުފެންނަ ވަގުތެއް މަދުވާނެއެވެ. ގިނަ ވަގުތު ހޭދަ ކުރަނީ ބައްޕަ އޭނާއަށް ހަދައިދީފައިވާ ނަމާދު ކޮޓަރީގެ ތެރޭގައެވެ. ރުކޫޢުކޮށް، ސަޖިދަކޮށް، ދުޢާ ކުރުމުގައެވެ. އެއީ ފަތިހުން ފެށިގެން އިރުއޮއްސެންދެން އޭނާގެ ޢަމަލުތައް ހުންނަ ގޮތެވެ. ފޫހިވުމަކީ އޭނާގެ ތަބީޢަތުގައި ނެތް ކަމެއް ފަދައެވެ.

އިސްލާމީ ތާރީޚަށް ބަލާލާއިރު، އަހަރެމެންނަށް ފެންނަނީ ހަމައެކަނި ޞަޙާބީންގެ ހިތްވަރާއިޒ ޢަޒުމާއި އެބޭކަލުން ދީނުގެ ހައްގުގައި ވެވަޑައިގެންނެވި ގުރުބާނީ އެކަންޏެއް ނޫނެވެ. އެހެނެއް ކަމަކު، ޞަޙާބިއްޔާއިންގެ ޢަޒުމާއި، ކެރުން ތެރިކަމާއި، ހިތްވަރާއި، އަދި ލަދުވެތިކަމާއި ޢިއްްފަތްތެރި ކަމުގެވެސް އެތަކެއް ވާހަކަތައް ފެންނަން އެބަހުއްޓެވެ.