އަބޫ ހުރެއިރާ ރަޟިޔަالله ޢަންހު އަކީ ޔަމަނުގެ ގަބީލާއެއް ކަމަށްވާ އައްދައުސް އަށް ނިސްބަތްވެވަޑައިގަންނަވާ ބޭކަލެކެވެ. އެކަލޭގެފާނު އިސްލާމްވެވަޑައިގަތީ ހިޖުރައިން 7 ވަނަ އަހަރު އައްޠުފައިލް ބުން ޢަމްރު އައްދައުސީގެ އަތްމައްޗަށެވެ. އެއިރު އެކަލޭގެފާނުގެ އުމުރުފުޅަކީ 30 އަހަރެވެ.

އިސްލާމްވެޑައިގެންނެވުމަށްފަހު އެކަލޭގެފާނު ރަސޫލާ ޞޢވ އާއި ބައްދަލު ކުރައްވަން ވަޑައިގެންނެވި އެވެ. އެގޮތުން އަބޫހުރައިރާ ރަސޫލާ ޞޢވ އާއި ފުރަތަމަ ބައްދަލުވި އެ ބައްދަލު ކުރެއްވުމުގެ ތެރެއިން އެކަލޭގެފާނުގެ ނަންފުޅަކީ ކޮބައިތޯ ރަސޫލާ ޞޢވ އެއްސެވިއެވެ. 

ޖަވާބުގައި އަބްދުއް ޝަމްސު ކަމުގައި އެކަލޭގެފާނު ދެންނެވިއެވެ. 

އެފަދައިން ދެންނެވުމުން އަބްދުއް ޝަމްސު ގެ ބަދަލުގައި އަބޫހުރެއިރާގެ ނަންފުޅު އަބްދުއްރަހުމާނު އަށް ރަސޫލާ ޞޢވ ބަދަލުކުރެއްވިއެވެ. 

އަބޫ ހުރެއިރާއަށް އަބޫ ހުރެއިރާގެ ނަމުން ނަންދެވުނުގޮތަކީ ކޮބައިކަން ބަޔާންކުރައްވަމުން އެކަލޭގެފާނު ވިދާޅުވިއެވެ. 

"މީސްތަކުން އަހަރެންނަށް އަބޫ ހުރެއިރާގެ ނަމުން މުޚާތަބު ކުރަނީ، އެއްދުވަހަކު އަހަރެން، އަހަރެންގެ އާއިލާގެ ބަކަރިތައް ބަލަހައްޓަމުން ދަނިކޮށް ވަގު، ކުޑަ ބުޅަލެއް ފެނުނެވެ. އަދި އޭތި އަހަރެންގެ އަތުގައިވާ ފޮތިގަނޑަކަށް ލީމެވެ. އަދި ގެއަށް އެނބުރި އައި ވަޤުތު އެ ބުޅާ ގޮވާ އަޑު އަހަރެންގެ އާއިލާގެ މީހުންނަށް އިވުނެވެ. އަދި އެއީ ކޮންއެއްޗެއްތޯ ސުވާލުކުރިއެވެ. އެއީ ސަހަރާ ތެރެއިން ފެނުނު ކުޑަ ބުޅަލެއް ކަމުގައި ދެންނެވީމުއެވެ. ދެން އެމީހުން ބުންޏެވެ. ތިއީ އަބޫ ހުރެއިރާއެވެ. (ބުޅަލުގެ ބައްޕައެވެ.) އަހަރެން ރޭގަނޑުވުމުން އެބުޅާ ގަހަށް އަރުވަމުއެވެ. އަދި ދުވާލުވުމުން އަހުރެންނާއިއެކު އެބުޅާ ގެންދަމުއެވެ. އަދި އެއާއި އެކު ކުޅެ ހަދަމެވެ."

އަބޫ ހުރެއިރާ އެކަލޭގެފާނުގެ މި ނަމާމެދު އެހާ ހިތްޕުޅާއެއް ނުވެއެވެ. އެގޮތުން އަބޫ ހުރެއިރާ ވިދާޅުވިއެވެ. 

"މީސްތަކުން އަހަރެންނަށް ކިޔާ އުޅޭނީ އަބޫ ހުރެއިރާއެވެ. އެކަމަކު އަހުރެން އެނަމަކަށް އެހާ ހިތްހަމައެއް ނުޖެހެމެވެ. رسول الله صلى الله عليه وسلم މުޚާތަބު ކުރައްވަނީ "އަބޫ ހިއްރު" މިފަދައިންނެވެ."

އަބޫ ހުރެއިރާ އެކަލޭގެފާނަށް "އަބޫ ހުރެއިރާ" ކިޔުއްވަން ނުރުހެނީ އެއީ ބުޅަލުގެ އަންހެން ޖިންސުގެ ނަން ކަމުގައިވާތީއެވެ. ހިއްރު އެއީ ފިރިހެން ބުޅަލަށް ކިޔާ ނަމަވެ. ރަސޫލާ صلى الله عليه وسلم މުޚާޠަބުކުރައްވަނީ ފިރިހެން ބުޅަލުގެ ނަމުންނެވެ.