އެކުވެރި ގައުމުތަކާއި ދިވެހި ރާއްޖެއާއި ދެމެދު އޮންނަ ގުޅުމަށް ބުރޫ އަރުވައި ނަފްރަތު އުފެއްދުމަކީ ގައުމީ ސަލާމަތަށް އޮތް ނުރައްކަލެއްކަމަށް ކަނޑައަޅައި އެކަން ހުއްޓުވުމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސާލިހް ނެރުއްވާފައިވާ ގަރާރަށް ގޮންޖައްސަވައި އެމަނިކުފާނު އަމިއްލަ ޕާޓީގެ ލީޑަރ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޗައިނާއިން ރާއްޖޭގައި ޑިކްޓޭޓަރ ޝިޕެއް އުފައްދަން ބޭނުންވާކަމަށް ވިދާޅުވެއްޖެއެވެ.
އިންޑިއާގެ ވެރިން ރުއްސެވުމަށްޓަކައި ނަޝީދު ވިދާޅުވީ އޭނާ އަބަދުވެސް އިސްކުރައްވާނީ އިންޑިއާ ފަސްޓް ޕޮލިސީ ކަމަށާއި ޗައިނާއިން ގެންގުޅޭ ދަރަނި ދަންތުރައިގައި ޖައްސައި ބިން ވެރިކުރުމުގެ ޕްލޭނަށް ޖާގަ ނުދެއްވާނެކަމަށެވެ.
" ޗައިނާމ ބޭނުންވަނީ ރާއްޖޭގައި ޑިމޮކްރަސީ ނައްތާލުމަށްފަހު އޮޓޮކްރަޓިކް ވެރިކަމެއް އުފައްދައި ޑިކްޓޭޓަރ ޝިޕެއް އުފެއްދުމަށްފަހު އެމީހުން ބޭނުންވާ ކަންތައްތައް ކުރަން. ދިވެހި ރާއްޖޭގެ ދަރަނީގެ 70 އިންސައްތައަކީ ޗައިނާއަށް ދައްކަން ޖެހިފައިވާ ދަރަނިތައް. މިއީ ޗައިނާއަށް ސިޔާސީ ގޮތުންނާއި އިގްތިސާދީގޮތުން ރާއްޖެއަށް ނުފޫޒު ހިންގަން ދެވިފައި އޮތް ބާރެއް" އެއްވެސް ހެއްކެއް ދެއްކުމެއްނެތި ނަޝީދު އަބަދުވެސް އިންޑިއާގެ ސިޔާސީ މީހުން ރުއްސަން ހައްދަވާ އިތުރުފުޅު ތަކުރާރު ކުރެއްވިއެވެ.
ނަޝީދު ވިދާޅުވީ އެމަނިކުފާނު ބޭނުންފުޅުވަނީ ދިވެހި ރާއްޖެ އިންޑިއާއާއި ގާތްކުރަން ކަމަށެވެ.
" ދިވެހި ރާއްޖެއިން ބޭނުންވަނީ އިންޑިއާއާއި ގާތް ރަހުމަތްތެރިކަމެއް ބާއްވަން. އަޅުގަނޑަށް އެކަމުގައި އެއްވެސް ޝައްކެއްނެތް. އަހަރެންނަކީ ސިޔާސީ މީހަކަށް ވާތީ އަހަރެން މިހެން ބުނެގެން ނުވާނެ. އަހަރެން ބުނެގެންނުވާނެ އަހަރެންނަށް ގިނައިން ވޯޓް ނުލިބޭ ވާހަކައެއްވެސް. އަހަރެންނަށް ޔަގީން މިހާތަނަށް ދެގައުމަށް ގާތް ނުވެވޭ މިންވަރަށް ގާތްވެވޭނެ ގޮތް އަހަރެމެންނަށް ފެންނާނެ" ނަޝީދު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި އިންޑިއާގެ ކުރީގެ ފޮރިން ސެކްރެޓަރީ ޝިޔާމް ޝަރަން މޮޑަރޭޓްކުރި އެއްވުމެއްގައި ލެކް ޗަރެއް ދެއްވަމުން ވިދާޅުވިއެވެ.
އިދިކޮޅު ލީޑަރ ކުރީގެ ރައީސް އަބްދުﷲ ޔާމީން ފަށްޓަވާފައިވާ އިންޑިއާ އައުޓް ކެމްޕެއިނަށް ނިސްބަތްކުރައްވައި ނަޝީދު ވިދާޅުވީ ރާއްޖޭގައި ފްރީ ސްޕީޗް ނުވަތަ ޚޔާލުފާޅުކުރުމުގެ މިނިވަންކަން އޮންނަންވީ ގޮތް ކަނޑައެޅުމުގެ ގާނޫނެއް އެކުލަވާލުމުގެ ވިސްނުން މިހާރު އޮތް ކަމުގައެވެ.
