ސަރުކާރުން އިހުމާލުވަނީ ހަމައެކަނި ކަޅުބިލަމަހުގެ މަސްވެރިންނަށް އެކަނި ނޫންކަމަށާއި، ކަންނެލި މަސްވެރިންނަށް ސަރުކާރުގެ އަޅާލުން އެއްވެސް ވަރަކަށް ނުލިބޭކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ. 

ޝިޔާމު މިފަދައިން ވިދާޅުވެފައިވަނީ ބޮޑު ކަންނެލީގެ މަސްވެރިންގެ ކަންބޮޑުވުންތައް ހިއްސާކުރުމަށް ބޮޑުކަންނެލީގެ މަސްވެރިންގެ ޔޫނިއައުން ނެރުނު ބަޔާނެއް ޓްވިޓާގައި ހިއްސާކުރައްވަމުންނެވެ. 

އެ ބަޔާނުގައި މަހަށް ހަމައަގު ކަނޑަނޭޅުމާއި ތެލުގެ އަގު ބޮޑުވުން އަދި އައިސް ލިބުން އިންތިހާއަށް ދަތިވާއިރު ސަރުކާރުން އަޅާނުލާކަމަށް ބުނެ ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) އިން ވަނީ ގިނަ ކަންބޮޑުވުންތަކެއް ހިއްސާކޮށްފައެވެ. 

އޭގެ ތެރޭގައި ކަންނެލީގެ ފްލޯ ޕްރައިސް ކަނޑައެޅުމާއި ގުޅޭގޮތުން 2021 ވަަނަ އަހަރު ފެށި މަޝްވަރާތައް ވަކި ހިސާބަކުން ހުއްޓާލާ، އެފަހުން އަޅާ ނުލެވި އޮތްކަން ެ ޖަމުއިއްޔާއިން ފާހަގަކުރެއެވެ. އަދި ތެލުގެ އަގު ބޮޑުވުމާއެކު، އެކަށީގެންވާ މިންވަރަށް މަސް ނުކިރޭތީ ދޯނިތަކުން ބޮޑެތި ޚަރަދުތަކެއް ކުރަންޖެހުމަކީވެސް ތަކުލީފެއްގެ ގޮތުގައި ވަނީ ފާހަގަކުރައްވާފައެވެ. 

މަސްވެރިންގެ ހުރި ކަންބޮޑުވުންތައް ހިއްސާކުރައްވަމުން ޝިޔާމު ވިދާޅުވީ ކަންނެލި މަސްވެރިންނަށް ސަރުކާރުގެ އަޅާލުން ނުލިބޭ ތާގައި، މަސްވެރި ވަޒީރު ފިއްލަވައިގެން އުޅުއްވާތާވެސް ދޮޅު އަހަރުވެއްޖެކަމަށެވެ. 

ގިނަ ދުވަސްތަކަކަށްފަހު މަސްވެރިކަން ތިޔާގިވެފައިވާއިރު، މަސް ކިރޭގެ ރަނގަޅު އިންތިޒާމުތައް ހަމަޖައްސާދެވިފައި ނުވާކަމުގެ ޝަކުވާތައް މަސްވެރިން ދަނީ ކުރަމުންނެވެ. 

މަސްވެރިންގެ ޝަކުވާތަކާއި ގުޅިގެން ފިޝަރީޒް މިނިސްޓަރު މަޖިލީހަށް ހާޒިރުކޮށް ކުރި ސުވާލުތަކަށް ޖަވާބުދެއްވަމުން މިނިސްޓަރު ވަނީ މަސްވެރިކަން ރަނގަޅުވާ މޫސުމާއި ދިމާކޮށް ސަރުކާރުން ގަންނަން މަސައްކަތްކުރި ބޯޓުތައް ގަނެވިފައި ނުވާކަމަށް ވިދާޅުވެފައެވެ.