ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން މަސްވެރިންނަށް ވެފައިވާ ހަމައަގުގެ ވައުދު ދައުރުގެ މިހާތަނަށް އައި އިރުވެސް ފުއްދިފައި ނުވާއިރު، ބޮޑު ކަންނެލީގެ މަސްވެރިކަން އިންތިހާއަށް ދަށަށް ގޮސް ނެތި ހިނގައިދާނެ ކަމުގެ ބިރު ހީވެފައިވާކަމަަށް ބޮޑު ކަންނެލީގެ މަސްވެރިކަން ހިމާޔަތްކޮށް ކުރިއެރުވުމަށް އުފައްދާފައިވާ ޖަމިއްޔާއެއް ކަމަށްވާ ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) އިން ބުނެފިއެވެ.

ބީކޭއެމްޔޫ އިން ނެރުނު ބަޔާނެއްގައި ބުނެފައިވަނީ ބޮޑުކަންނެލި މަސް ގަނެވޭނެ އެންމެ ކުޑަ އަގެއް ކަނޑައެޅުމަކީ އެ ޔޫނިއަނުން މިހާރު ކުރަމުން އަންނަ އެންމެ މުހިއްމު މަސައްކަތް ކަމަށެވެ. އެހެނީ، މަސްވެރިކަން ކުޑަކޮށްވެސް ރަނގަޅުވެލާއިރަށް ބޮޑުކަންނެލި ގަންނަ އަގު މަސްވެރިންގެ މަސައްކަތް ދެކޮޅުނުޖެހޭ މިންވަރަށް ކުޑަކުރަމުންދާ ކަމަށެވެ. 

މިއާއެކު އެ ބަޔާނުގައި ބުނީ، މި ސަރުކާރުން މަސްވެރިންނަށް މަހުގެ ހަމައަގު ހޯދައިދިނުމަށް ވެފައިވާ ވައުދު ފުއްދުމުގެ ގޮތުން 2021 ވަނަ އަހަރުގައި މަސްވެރިންނާއި ބޮޑުކަންނެލި ގަންނަ ކުންފުނިތަކާއެކު ކޮންމެވެސް ވަރަކަށް މަޝްވަރާކުރި ކަމުގައިވީ ނަމަވެސް އޭގެ ފަހުން އެއްވެސް މިންވަރަކަށް މަޝްވަރާތައް ކުރިއަށްނުދާ ކަމަށެވެ.  

Advertisement

އަދި ބޮޑުކަންނެލި ގަންނަ ކުންފުނިތަކާއެކު ކުރި މަޝްވަރާތަކުން ކުރިއެރުމެއް ނުލިބުމުން، ސަރުކާރާއެކު މަޝްވަރާތައް ކުރިއަށް ގެންދަން ތަކުރާރުކޮށް އެދިފައިވާ ކަމަށާ އެހެންނަމަވެސް، ދަށް އަގު ކަނޑައެޅުމުގައި ކުރިއެރުމެއް ނުލިބޭކަމަށް އެ ޔޫނިއަނުން ބުނެއެވެ.

"ބޮޑު ކަންނެލީގެ މަސްވެރިކަމުގެ ސިނާއަތް ދުވަހުން ދުވަހަށް ދަށަށް ގޮސް ނެތި ހިނގައިދާނެ ކަމުގެ ބިރު މިހާރު ވަނީ ހީވާން ފަށާފައި." ބީކޭއެމްޔޫ ގެ ބަޔާނުގައި ވެއެވެ. 

އެ ޔޫނިއަނުން ފާހަގަކުރި ގޮތުގައި ތެލުގެ އަގު އެތައް ތަނެއް ބޮޑުވެ ޚަރަދުވަނީ ވަރަށް ބޮޑަށް އިތުރުވެފައެވެ. އަދި އުތުރާއި ދެކުނުގައި މަސްވެރިންނަށް ސަރުކާރުން ކަނޑައަޅާފައިވާ ސަބްސިޑީ މާލެ ސަރަހައްދުން ތެޔޮ ގަންނަ މަސްވެރިންނަށް ނުލިބުމުން ބޮޑުކަންނެލީގެ މަސްވެރިކަން ކުރާ އޮޑިފަހަރަށް ތެޔޮ ގަންނަންޖެހެނީ އެންމެ ބޮޑު އަގުގައި ކަމަށް އެ ޔޫނިއަނުން ބުނެއެވެ.

އަދި ހަމަ  އެހެންމެ، ތެލުގެ އަގަށް ބައިނަލްއަޤުވާމީ ބާޒާރުގައި އަންނަ ހެޔޮ ބަދަލު ރާއްޖޭގައި ތެޔޮ ވިއްކާ އަގަށް ނާންނަކަމަށާ، މިފްކޯގެ އައިސް ޕްލާންޓުތައް ދަރަނިން ސަލާމަތްނުވެވިގެން އުޅޭ ފެނަކައިގެ ދަށަށް ބަދަލުކުރުމަކީ އެކަމުގެ ސަބަބުން އައިސް ގަންނަން ލިބޭ އަގުވެސް އިތުރަށް އުފުލޭނެ ކަމެއްގެ ގޮތުގައި ޔޫނިއަނުން ފާހަގަކުރެއެވެ.

މީގެ އިތުރުން، ކަންނެލި ގަންނަ ކުންފުނިތަކުގެ ހާލަތު ރަނގަޅުވުމަކީ މުހިއްމުކަމެއް ކަމުގައި ދެކޭކަން ހާމަކުރުމާއެކު އެ ޖަމްއިއްޔާއިން ބުނީ، އެ ކުންފުނިތަކަށް ސަރުކާރުން ލިބެންޖެހޭ އެއްބާރުލުން ނުލިބުމުގެ ސަބަބުން ކަންނެލި ކިރޭ މިންވަރު މަދުވެ، ކިއުގައި އެތައް ދަުވަހެއް ހޭދަކުރާންޖެހިފައިވާ ކަމަށެވެ. އަދި ކަންނެލި ކިރުނު ނަމަވެސް ކިރާ ކަންނެއްޔަށް ދުވަހުން ދުވަހަށް ލިބެންޖެހޭ ފައިސާ ނުލިބުމަކީވެސް ބޮޑު ކަންބޮޑުވުމެއް ކަމުގައި އެ ޖަމްއިއްޔާއިން ފާހަގަކުރިއެވެ.

މިއާއެކު ބޮޑުކަންނެލީގެ މަސްވެރިކަން ސަލާމަތްކުރުމުގައި ސަރުކާރުގެ ކޮނޑުގައި އެޅިފައި އޮތް ބޮޑު ޒިންމާއަށް އިހުމާލުނުވުމަށް އެ ޖަމިއްޔާ އިން ވަނީ ސަރުކާރަށް ގޮވާލާފައެވެ.