ސަރުކާރުގެ ވާދަވެރިން ކިތަންމެ ވަރަކަށް ފިތުނަ އުފެއްދިނަމަވެސް، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރު ވައްޓާ ނުލެވޭނެކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ. 

ނިހާދު މިފަދައިން ވިދާޅުވެފައިވަނީ ސަރުކާރުގެ ވާދަވެރިންނަށް ފާޑުކިޔުން އަމާޒުކުރައްވާ ކުރެއްވި ޓްވީޓެއްގައެވެ. 

އެގޮތުން ނިހާދު ވިދާޅުވީ 2023 ގެ ރިޔާސީ އިންތިޚާބު ބޯމަތިވަމުން އަންނަ އިރު، މިހާރު އޮތް ސަރުކާރާއި މެދު ރައްޔިތުންގެ ހިތުގައި ނަފުރަތު އުފެއްދުމަށް ގިނަ މަސައްކަތްތަކެއް ކުރަމުންދާކަމަށެވެ. އަދި ރައްޔިތުންނަށް އޮޅުވާލާ ފިތުނަ އުފައްދާ ސަރުކާރު ވައްޓާލެވޭތޯ ކުރަމުންދާ މަސައްކަތް މެކުހައް ޖަހާފައިވާކަމަށެވެ. 

Advertisement

އެހެން ނަމަވެސް އެގޮތަށް ވާދަވެރިން ކިތަންމެ މަސައްކަތެއް ކުރި ނަމަވެސް މި ސަރުކާރު ވައްޓާ ނުލެވޭނެކަމަށް ނިހާދު ވަނީ ވިދާޅުވެފައެވެ. އަދި ފިތުނަ އުފައްދައިގެން ސަރުކާރު ވައްޓާލެވޭވަރަށްވުރެ ރައްޔިތުން މި ސަރުކާރުގެ ދެކެ ލޯބިވާކަމަށް ނިހާދު ގެ ޓްވީޓުގައި ވަނީ ވިދާޅުވެފައެވެ. 

ފިތުނަ އުފައްދައިގެން ސަރުކާރު ވައްޓާލަން ބަޔަކު މަސައްކަތް ކުރާކަމަށް ނިހާދު ވިދާޅުވިނަމަވެސް، އެއީ ކޮން ބައެއްކަން ސާފުކޮށް އޭނަގެ ޓްވީޓުގައި ބަޔާންކޮށްފައެއް ނުވެއެވެ. 

ނިހާދުގެ ފާޑުކިޔުންތައް އަމާޒުކުރައްވާފައިވަނީ ޗާގޯސް މައްސަލައިގައި ސަރުކާރާއި ވާދަވެރި ސިޔާސީ ޕާޓީއިން ގިނަ ތުހުމަތުތަކެއް ސަރުކާރަށް އަމާޒުކުރަމުންދާ ދަނޑިވަޅެއްގައެވެ. އަދި ވާދަވެރި ސިޔާސީ ޕާޓީގެ އިތުރުން ސަރުކާރު ކޯލިޝަންގައި ހިމެނޭ ބައެއް ޕާޓީތަކުގެ އިތުރުން އެމްޑީޕީގެ ނަޝީދު ފެކްޝަންގެ މެމްބަރުންގެ ނުރުހުންވެސް އަމާޒުކުރައްވާފައިވެއެވެ. 

ބެލެވޭ ގޮތުގައި ނިހާދުގެ މި ނުސީދާ ރައްދަކީ މި ހުރިހާ ފަރާތްތައް ޝާމިލުވާގޮތަށް ދީފައިވާ ރައްދެކެވެ. އަދި އެ ޓްވީޓުގެ މަގްސަދަކީ ސަރުކާރަށް ރައްޔިތުން އިތުބާރުކުރާކަން ވާދަވެރިންނަށް ހަނދާންކޮަށްދިނުން ކަމުގައި ބެލެވެއެވެ.