ހެޔޮވެރިކަން ދަމަހައްޓަން މޭ އައްޑަނައަކަށް ދިއްކުރާނެކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
ނިހާދު މިފަދައިން ވިދާޅުވެފައި ވަނީ އެމްޑީޕީގެ ދެ ރައީސުންނަށް ތާއީދު ކުރާ މެމްބަރުންގެ ކޯޅުން ބޮޑުވެފައިވާ ދަނޑިވަޅެއްގައި ކުރެއްވި ޓްވީޓެއްގައެވެ.
ނިހާދުގެ ޓްވީޓުގައި ވަނީ ފިސްފިސް ކޮށްލިޔަސް ބާޣީއަކަށް ނުވެވޭނެކަމަށް ވިދާޅުވެފައެވެ. ނުސީދާކޮށް ނިހާދު އެ ވިދާޅުވީ މިހާރު އޮތް އެމްޑީޕީ ސަރުކާރަށް ގައްދާރުވާން ބޭނުން ނުވާ ވާހަކައެކެވެ.
އެއާއެކު އޭނާ ވިދާޅުވީ ބަޔަކު ހިތްހަމަ ނުޖެހުނަސް އަދި ކިތަންމެ އަނިޔާއެއް ލިބުނު ނަމަވެސް ފަހަތަށް ނުޖެހޭނެކަމަށެވެ. އަދި ހެޔޮ ވެރިކަން ދެމެހެއްޓުމަށް ވާން ޖެހުނު ކޮންމެ ގުރުބާނީއެއް ވާން ތައްޔާރަށް ހުރިކަމަށް ނިހާދު ވިދާޅުވިއެވެ.
"ހެޔޮވެރިކަން" މިއީ ރައީސް އިބްރާހިމް މުހައްމަދު ސޯލިހުގެ ވެރިކަމަށް ނިސްބަތްކޮށް އެމަނިކުފާނަށް ތާއީދުކުރާ މެމްބަރުން ކިޔާ އުޅޭ އެއްޗެކެވެ. އެހެންކަމުން ހެޔޮވެރިކަން ދިފާއުކުރާނެކަމަށް ނިހާދު ވިދާޅުވީ ރައީސް ސޯލިހުގެ ވެރިކަން ދިފާއުކުރުމަށް ކަމަށް ބެލެވެއެވެ.
ރައީސް ސޯލިހުއަށް ތާއީދުކުރައްވާ މެމްބަރުން ގެންދަވަނީ އެމަނިކުފާނަށް ދެވަނަ ދައުރެއް ދޭން ޖެހޭކަމަށް ވަކާލާތު ކުރައްވަމުންނެވެ. އަނެއްކޮޅުން ނަސީދަށް ތާއީދުކުރައްވާ މެމްބަރުން ވިދާޅުވަމުން ގެންދަވަނީ އެމަނިކުފާނަށް ދެވަނަ ދައުރެއް ދޭން ޖެހޭ އެއްވެސް ސަބަބެއް ނެތް ކަމަށެވެ.
Advertisement
This content is created and paid for by advertisers and does not involve Voice Journalists
