ވެރިކަމުގެ މަސްތުން ދުރުގައި ހުންނަން ކިތަންމެ ބޭނުންވިއަސް ދުރުގައި ހުރެވެނީ ކުޑަ ދުވަސްކޮޅެއްގައި ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު، އެމްޑީީޕީގެ ގައުމީ މަޖިލީހުގައި ވިދާޅުވި ކަމަށް ފޭދޫ ދާއިރާގެ މެންބަރު މުހައްމަދު ނިހާދު ވިދާޅުވެއްޖެެއެވެ. 

2018 ވަނަ އަހަރުގެ އެމްޑީީޕީގެ މެނިފެސްޓޯގައި އެޕާޓީގެ މެންބަރުންނަށް ޕާޓީން ވެފައިވާ އެންމެ މުހިންމު ވައުދަކީ ވެރިކަމުގެ ނިޒާމް ބަދަލުކުރުމަށް ފެންނަ ނުފެންނަ ވޯޓެއް ނެގުން ކަމަށާ، އެކަމަށް ކޯލިޝަންގެ ލީޑަރުންވެސް އެއްބަސްވެވަޑައިގެންފައިވާ ކަމަށް ރައީސް ނަޝީދު ވިދާޅުވުމާއި ގުޅިގެން އެކަމަށް ރައްދު ދެއްވައި ނިހާދު ކުރެއްވި ޓުވީޓެއްގައި އޭނާ ވަނީ އެކަން ދޮގު ކުރައްވައި އެއްބަސް ވެގެން ހެދި ކޯލިޝަން މެނިފެސްޓޯގައި އެވާހަކަ ނުވާ ކަމަށް ވިދާޅުވެފައެވެ. 

މިއާއެކު ނިހާދު ވިދާޅުވީ، ވެރިކަމުގެ މަސްތުން ދުރުގައި ހުންނަން ކިތަންމެ ބޭނުންވިއަސް ދުރުގައި ހުރެވެނީ ކުޑަ ދުވަސްކޮޅެއްގައި ކަމަށް އެމްޑީޕީގެ ގައުމީ މަޖިލީހުގައި ރައީސް ނަޝީދު ވިދާޅުވި ކަމަށެވެ. 

Advertisement

"އެހެންކަމުން ނިޒާމް އަށް ބަދަލު ގެނެސް އެކަން ކުރަން ބޭނުންކަމަށް އޯޕަންކޮށް ވިދާޅުވި. ގައުމީ މަޖިލިސްގައި ނެތް ބޭފުޅުންނަށް ސާފު ނުވެދާނެ." ނިހާދު ވިދާޅުވިއެވެ. 

މީގެ އިތުރުން ވެސް ނިހާދު ކުރި ޓުވީޓެއްގައި އޭނާ ވަނީ ދުނިޔޭގެ އެކި ކަންކޮޅުތަކުގައި އެކި ވައްތަރު ބަރުލަމާނީ ނިޒާމް އަށް ވެރިކަން ކުރަމުން އަންނަ އިރު ރާއްޖެއަށް ގެންނަން އުޅެނީ އެއިން ކޮން ވައްތަރެއް ތޯ ސުވާލު ކުރައްވާފައެވެ. 

އަދި އެއީ ހެޔޮ ވެރިކަމުގެ ނިޒާމޭ ބުންޏަސް އެއީ ކޮން ވައްތަރެއް ކަން ސާފުނުވާ ކަމަށާ، އެކަން އެނގިގެން ނޫނީ ދިވެހިންގެ ތާއީދެއް ނޯންނާނެ ކަމަށް ވެސް އޭނާ ވިދާޅުވިއެވެ.