މީގެ ކުރިންވެސް 2 ފަހަރެއްގެ މަތިން ރާއްޖެ ވަޑައިންނެވި އޮސްޓްރޭލިއާގެ ސަރޓިފައިޑް ނިއުރޯ-ލިންގުއިސްޓިކްސް ޕްރޮގްރާމް (އެން.އެލް.ޕީ) ޕްރެކްޓިޝަނަރ ރައޯވާ ހައްދާދް މިހިނގާ ޑިސެމްބަރ މަހުގެ 27 ގައި ރާއްޖެ ވަޑައިގަންނަވާގޮތައް ހަމަޖެހިއްޖެއެވެ.

ރާއްޖޭގައި ތަފާތު އިޖުތިމާޢީ ހަރަކާތްތައް ހިންގާ ޕީސް ފައުންޑޭޝަނާއި އޮސްޓްރޭލިއާގެ މަދީނާ އެކެޑެމީ ގުޅިގެން، މި ދަތުރުގައި މާލެ ހިމެނޭހެން ރާއްޖޭގެ ދެ ރަށެއްގައި ގިނަގުނަ ޕްރޮގްރާމްތައް ހިންގުމަށް ވަނީ ހަމަޖެހިފައެވެ.

ރައޯވާ އަކީ ރާއްޖޭގެ އިތުރުން ދުނިޔޭގެ އެކި ކަންކޮޅުތަކުގައި ލައިފް ކޯޗިންގ ވޯކްޝޮޕްތައް ހިންގަވާ ބޭކަނބަލެކެވެ. އެގޮތުން، އޮސްޓްރޭލިއާ، ނިއުޒިލަންޑް، މެލޭޝިއާ، ސްޕެއިން އަދި ފިޖީ ފަދަ ޤައުމުތަކުގައި ޒުވާނުންނަށް، ޚާއްޞަކޮށް ޒުވާން އަންހެން ކުދިންނަށް ވޯކްޝޮޕްތައް ހިންގަވާފައިވެއެވެ.

އެންމެ ފަހުން ރައޯވާ ރާއްޖެ ވަޑައިގެންނެވި ދަތުރުރުގައި ތަފާތު ގިނަ ވޯކްޝޮޕްތަކެއް ހިންގަވާފައިވެއެވެ. އެގޮތުން، އެޑިއުކޭޝަން މިނިސްޓްރީގެ ސީނިއަރ ސްޓާފުންނަށް ކުރިޔައްގެންދެވުނު ލީޑަރޝިޕް ވޯކްޝޮޕު ފާހަގަކޮށްލެވެއެވެ. މާލެ ސަރަހައްދުގެ ހުރިހާ ސުކޫލެއްގެ ޕްރިންސިޕަލުން ބައިވެރިވެވަޑައިގެންނެވި މި ވޯކްޝޮޕުގައި މިނިސްޓަރ އޮފް އެޑިއުކޭޝަން ޑރ. ޢާއިޝަތު ޢަލީ ވެސް ބައިވެރިވެވަޑައިގެންނެވިއެވެ.

ރާއްޖެއަށް މިފަހަރު ކުރައްވާ ދަތުރުގައި ރައޯވާ ކުރިޔަށް ގެންދަވާނެ ޕްރޮގްރާމްތަކުގެ ތެރޭގައި އަންހެން ކުދިންނަށް ޚާއްޞަ ޕްރޮގްރާމްތަކާއި އަދި ކުޑަކުދިންނާއި ބެލެނެވެރިންނަށް ޚާއްޞަ ލައިފް ކޯޗިންގ ވޯކްޝޮޕްތައް ހިމެނެއެވެ. ޕްރޮގްރާމްތައް ކުރިޔަށް ދާނީ މާލެ އާއި ރ. މީދޫ ގައެވެ.

ޕީސް ފައުންޑޭޝަނަކީ ރާއްޖޭގެ އެކި ކަންކޮޅުތަކުގައި ތަފާތު އެކިއެކި ޕްރޮގްރާމްތައް ހިންގާ ޖަމިއްޔާ އެކެވެ. 2010 ވަނަ އަހަރު އުފަންވި މި ޖަމިއްޔާއިން މިހާރުވަނީ ދިވެހިރާއްޖޭގެ ދީނީ ހޭލުންތެރިކަން އިތުރުކުރުމާއި، އިޖްތިމާޢީ ގޮތުންނާއި ތަޢުލީމީ ގޮތުން ހަރުދަނާ ޖީލެއް ބިނާކުރުމުގައި ތަފާތު ގިނަގުނަ މަސައްކަތްތަކެއް ކޮށްފައެވެ.

މި ދަތުރުގެ އިތުރު މަޢުލޫމާތު ޕީސް ފައުންޑޭޝަނުގެ ސޯޝަލް މީޑިއާ ޕޭޖްތަކުން ލިބިލައްވާނެއެވެ. އަދި 9552949 އަށް ގުޅުއްވުމުންވެސް ލިބިލައްވާނެއެވެ.

ފޭސްބުކް: @PeaceFoundation.mv

އިންސްޓަގްރާމް: peace.mv

ޓްވިޓަރ: @Mv_Peace

ޓެލެގްރާމް: t.me/PeaceFoundation