ސައުދީ އަރަބިއްޔާގެ ވެރިރަށް ރިޔާޒުގެ ކިންގް ފަހުދު އިންޓަނޭޝަނަލް ސްޓޭޑިއަމްގައި މިރޭ ކުޅެވުނު ސްޕެނިޝް ސުޕަ ކަޕްގެ ފުރަތަމަ ސެމީފައިލް މެޗުގައި ޕެނަލްޓީ ޖަހައިގެން ވެލެންސިއާ ބަލިކޮށް މުބާރާތުގެ ފައިނަލްގެ ފުރަތަމަ ޖާގަ ރެއާލް މެޑްރިޑުން ހޯދައިފިއެވެ. 

މުބާރާތުގެ އެންމެ ފަހުގެ ޗެންޕިއަން ރެއާލް މެޑްރިޑް މި މުބާރާތުގެ ޗެންޕިއަންކަން 12 ފަހަރު ހޯދާފައި ވާއިރު 2018 ވަނަ އަހަރުގެ ކުރިން މި މުބާރާތް ބާއްވަމުން އައީ ސްޕެނިޝް ލަލީގާ އަދި ކޮޕާ ޑެ ލަރޭ ގެ ޗެންޕިއަނުންގެ މެދުގައި ސީޒަން ހުޅުވުމުގެ ގޮތުން ހޯމް އެންޑް އަވޭގެ އުސޫލުން ކުޅެވޭ މުބާރާތެއްގެ ގޮތުގައެވެ. ނަމަވެސް 2018 ވަނަ އަހަރުން ފެށިގެން މި މުބާރާތް ބާއްވަމުން އަންނަނި 4 ޓީމުގެ މެދުގައެވެ. ކޮޕާ ޑެ ލަރޭގެ ފައިނަލްގައި ކުޅޭ ދެޓީމުގެ އިތުރުން ލީގުގެ އެންމެ ކުރި ލިބޭ ދެ ޓީމާއެކު 4 ޓީމުގެ މެދުގައި ސީޒަނުގެ މެދުތެރެއިން ކުޅޭ އެއް ހަފްތާގެ މުބާރާތެއް ގޮތަށެވެ.

މިރޭގެ މެޗުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފުރަތަމަ ހާފުގައި ފެނިގެންދިޔައިރު ފުރަތަމަ ލަނޑުޖަހައި ލީޑް ހޯދީ ރެއާލް މެޑްރިޑުންނެވެ. މިއީ ފުރަތަމަ ހާފުގެ 39 ވަނަ މިނެޓުގައި ވެލެންސިއާގެ ސްވިޒަލޭންޑް ޑިފެންޑަރ އެރޭ ކޮމަރޓް އެޓީމުގެ ޕެނަލްޓީ އޭރިއާ ތެރެއިން ރެއާލްގެ ފޯވާޑް ކަރީމް ބެންޒެމާ އަށް ކުރި ފައުލަކާއި ގުޅިގެ ރެއާލް އަށް ލިބުނު ޕެނަލްޓީއަކުން ބެންޒެމާ ކާމިޔާބުކޮށްދިން ލަނޑެކެވެ.

ފުރަތަމަ ހާފު 1-0 ން ރެއާލް މެޑްރިޑް ކުރީގައި އޮވެ ނިމުނު ނަމަވެސް ދެވަނަ ހާފު ފެށިގެން 24 ސިކުންތް ނުވަނީސް ވެލެންސިއާ އިން މެޗުގެ ނަތީއްޖާ އެއްވަރު ކުރިއެވެ. މިލަނޑު އެޓީމަށް ކާމިޔާބުކޮށްދިނީ ބުރެޒިލްގެ މިޑްފިލްޑަރ ސެމިއުލް ޑިއާސް ލިނޯ އެވެ. މިއީ އެޓީމުގެ ސްޕެނިޝް ޑިފެންޑަރ ޓޯނީ ލަޓޯ ގޯލުކުރިމައްޗަށް ހުރަސްކޮށްދިން ބޯޅައެއް ރެއާލް މެޑްރިޑް ގޯލު އޭރިއާ ތެރެއިން މުޅިން ހުސްކޮށް އޮވެ އެއްފަހަރުން ޖަހައި ގޯލުގެ ތެރެއަށް ފޮނުވާލައިގެން ލިނޯ ކާމިޔާބުކުރި ލަނޑެކެވެ.

މެޗުގެ 90 މިނެޓް ކުޅުން ހަމަވި އިރު ދެޓީމު 1-1 ން އެއްވަރުވެފައި އޮތުމުން އިތުރުވަގުތުގެ 15 މިނެޓުގެ ދެ ހާފު ނިމުނީވެސް 1-1 ން ދެޓީމު އެއްވަރުފައި އޮވެގެންނެވެ. މެޗުގެ ނަތީއްޖާ ނެރުމަށް ޖެހި ޕެނަލްޓީގައި ރެއާލް ގެ ބެންޒެމާ، މޮޑްރިޗް، ކުރޫސް އަަދި އަސެންސިއޯގެ ޕެނަލްޓީ ކާމިޔަބުކުރި އިރު ވެލެންސިއާގެ ކަވާނީ، އިލައިކްސް މޮރިބާ، އަދި ހޫގޯ ގުއިލަމޮން ގެ ޕެނަލްޓީ ކާމިޔަބު ކުރިއެވެ. ނަމަވެސް އެޓީމުގެ އެރޭ ކޮމަރޓް އަދި ކެޕްޓަން ހޯސޭ ގަޔާ ގެ ޕެނަލްޓީ ނާކާމިޔާބުވެ ރެއާލް މެޑްރިޑަށް މުބަރާތުގެ ފައިނަލުން ޖާގަލިބުނީއެވެ. 

ފައިނަލުގައި ރެއާލް މެޑްރިޑް މި މަހުގެ 15 ވަނަ ދުވަހު ނުކުންނާނީ މާދަމާރޭ ކުޅެވޭ ސެމީފައިނަލުގެ ދެވަނަ މެޗުގައި ބާސެލޯނާ އާއި ރެއަލް ބެޓިސް ވާދަކުރާ މެޗުން މޮޅުވާ ޓީމަކާއި ދެކޮޅަށެވެ.