ރާއްަޖޭގެ އޯލެވެލްގެ ގަދަ ދިހައެއްގައި ހިމެނުނު އީމާން އަށް އޭނާގެ ރަށުން ވަނީ ހޫނު މަރުޙަބާއެއް ކިޔައިފިވެ.

6 އޭ ސްޓާރ އާއި 2 އޭ ހޯދައިގެން ފާތިމަތު އީމާން އިބްރާހިމް ހިމެނިފައިވަނީ ރާއްޖޭގެ ގަދަ10 އެއްގެ 3 ވަނަގައެވެ. މިއީ ކުނބުރުދޫގެ ތާރީޚުގައި އެންމެ ފުރަތަމަ ގަދަ 10ގައި އެރަށު ސުކޫލުން ކިޔެވި ކުއްޖަކު ހިމެނުނު ފުރަތަމަ ފަހަރެވެެ. 

މިމަހުގެ 15 ގައި ބޭއްވުނު ގަދަ 10ގެ ޖަލްސާ ނިންމާލައި ރަށަށް ދިއުމުން ރަށުގެ ރައްޔިތުން ނުކުމެ ވަނީ އީމާން އަށް ހޫނު މަރުޙަބާއެއް ކިޔައިފައިވެއެވެ. ރަށު ސްކޫލާއި، ކައުންސިލް އަދި ރަށުގެ ހުރިހާ މުއައްސަސާއެއް ވަނީ އީމާން އަށް މަރުހަބާ ކިޔުމުގައި ބައިވެރިވެފައި ވެއެވެ. 

ކުނބުރުދޫ ސްކޫލްގެ ޕްރިންސިޕަލް އަހްމަދު ނިޔާޒް ވޮއިސް އަށް މައުލޫމާތު ދެއްވަމުން ވިދާޅުވީ އީމާން އާއި އީމާންގެ އާއިލާއަށް ރަތް ދޫލައިގެ މަރުހަބާ އެއް ކިޔާފައިވާކަމަށެވެ. 

ނިޔާޒް ވިދާޅުވީ ރަށުގެ އަމިއްލަ ފަރާތްތަކުންވެސް އީމާން ރަށަށް އަރައިގެން އައި ވަގުތު މާބޮޑިތަކާއި ފައިސާގެ ހާރާއި މާފަތި ތަކުން މަރުހަބާ ކިޔައިފައިވާ ކަމަށެވެ.

އަދި އީމާން އާއި އީމާންގެ އާއިލާގެ ޝަރަފުގައި ރަށު ސްކޫލްގެ ބެލެނިވެރިންނާއި، ސްކޫލާއި، އަންހެނުންގެ ތަރައްޤީ އަށް މަސައްކަތް ކުރާ ކޮމިޓި އަދި ކައުންސިލް ގުޅިގެން ރޭގަނޑުގެ ކެއުމެއް ބޭއްވިފައި ވާ ކަމަށެވެ. އަދި މިހަފްލާގައި އެކި އެކި ފަރާތްތަކުން އީމާން އަށް ހަދިޔާތައް ދިީފައި ވާކަމަށް ޕްރިންސިޕަލް ވިދާޅުވިއެވެ. 

އީމާން އާއި ޢާއިލާގެ ޝަރަފުގައި ބޭއްވުނު ޑިނާރ ނައިޓުގައި އިމާން އޭނާގެ މަންމަ އާއި ބައްޕަ އާއި އެކުގައި؛ އެ ޑިނާރ ނައިޓުގައި އެ ރަށު ކައުންސިލާއި އެހެން މުއައްސަސާ ތަކުން އީމާން އަށްވަނީ ހަނދާނީ ފިލާ އާއި ހަދިޔާ އާއި ފައިސާގެ އިނާމް ދީފައި-- ފޮޓޯ/ ކުނބުރުދޫ ސުކޫލު

ޕްރިންސިޕަލް ނިޔާޒް ވިދާޅުވީ އީމާން އަކީ އެންމެ ތުއްތު އިރުއްސުރެވެސް ކިޔެވުމަށް ވަރަށް މޮޅު ކުއްޖެއް ކަމަށެވެ. ހިތްވަރާއި އެކު ބުރަ މަސައްކަތުން ކާމިޔާބު ހޯދި ކުއްޖެއް ކަމަށެވެ. 

"އީމާން އަކީ ވަރަށް ސެލްފް މޯޓިވޭޓެޑް ކުއްޖެއް، ކިތަންމެ ބައިވަރު ފިލާވަޅެެއް ދިނަސް ފަސް ޖެހުމެއް ޝަކުވާއެއް ނެތި ހަދާނެ" ނިޔާޒް ވިދާޅުވިއެވެ.

ނިޔާޒް ވިދާޅުވީ އަދި މިވީހާ ތަނަށް ވެސް އީމާންގެ އެއްވެސް އަޚްލާޤީ މައްސަލައެއް ރިޕޯޓް ކުރެވިފައި ނުވާކަމަށެވެ. 

އީމާންގެ ކިޔެވުމާއި ބެހޭގޮތުން އީމާން އާއި ވާހަކަ ދައްކާލުމުން އީމާން ބުނީ ގިނަ ގިނައިން ޕޭޕަރުތައް ޕްރެކްޓިސް ކުރުމާއި، ފިލާވަލުތައް ދަސްކުރުމާއި އޮންލައިން ކްލާސްތަކުގައި ވެސް ބައިވެރި ވި ކަމަށެވެ. އީމާން ބުނީ މިކަމުގައި އީމާންގެ އާއިލާގެ އެހީތެރިކަން ވަރަށް ބޮޑަށް ލިބިގެން ދިޔަ ކަމަށެވެ. 

އަދި ރަށަށް މިވަރުގެ ބޮޑު ފަޚުރެެއް ހޯދައި ދެވުމަކީ ވަރަށް އުފާވި ކަމެއް ކަމަށެވެ.

އީމާން ގަދަ 10 އެއްގެ 3 ވަނަ ހާސިލް ކޮށްފައިވަނީ ކުނބުރުދޫ ސްކޫލުން ކިޔަވައިގެނެވެ.