ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުންތައް ޖުލައި މަހަށް ފަސްކޮށްފި އެވެ. 

އެ މައްސަލައާއި ގުޅޭ އަޑުއެހުމެއް މިއަދުގެ 9:00 އަށް ކްރިމިނަލް ކޯޓުން ތާވަލުކުރި ނަމަވެސް، އެ މައްސަލައިގައި ދައުވާ އުފުލާފައިވާ ކްރިކް ރިޒާ އާލާސްކަންފުޅާއި އުޅުއްވާތީ މިއަދުގެ އަޑުއެހުން ވަނީ ކެންސަލްކޮށްފަ އެވެ. 

ކްރިމިނަލް ކޯޓުން ބުނީ ދެން އެ މައްސަލައިގެ އަޑުއެހުމެއް ބާއްވާނީ ޖުލައި މަހުގެ 2 ވަނަ ދުވަހުގައި ކަމަށެވެ. އަދި އެމަހު 4 ގައި ވެސް އަޑުއެހުމެއް ތާވަލުކުރެވިފައިވާކަމަށް ކްރިމިނަލް ކޯޓުން ވަނީ މައުލޫމާތު ދެއްވާފަ އެވެ. 

ފުއްގިރި މައްސަލައިގައި މިހާރު ކުރިއަށް ދަނީ ދައުލަތުގެ ފަރާތުން ހުށައަޅާ ހެކިންގެ ހެކިބަސް ނެގުމެވެ. މިހާތަނަށް ފަސް ފަރާތެއްގެ ހެކިބަސް ވަނީ ނަގާފަ އެވެ. 

އޭގެ ތެރޭގައި އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓާ އަބްދުالله ޒިޔަތުގެ ހެކިބަސް ހިމެނެއެވެ. 

މިހާތަނަށް އެ މައްސަލައާއި ގުޅިގެން 22 ގަޑިއިރުގެ ހެކިބަސް ވަނީ ނަގާފައެވެ. ފުއްގިރި މައްސަލަ އަވަސް އަރުވާލައިގެން ކުރިއަށް ގެންދާތީ ރައީސް ޔާމިނުގެ ފަރާތްޕުޅުން ވަނީ ބޮޑެތި ކަންބޮޑުވުންތަކެއް ވެސް ފާޅުކުރައްވާފަ އެވެ. 

އެގޮތުން ފުއްގިރި މައްސަލަ "ހަވާ ފަޓާސް ބަރިއެއް" ހެން ކުރިއަށް ގެންދާއިރު، ރައީސް ޔާމިނުގެ ފަރާތްޕުޅުން ހައިކޯޓަށް ހުށައަޅުއްވާފައިވާ އާރަށު އިސްތިއުނާފު މައްސަލައަށް ހުރަސް އެޅޭގޮތަށް ކުރިއަށްދެންދާތީ، އެމަނިކުފާނުގެ އިސްތިއުނާފީ ހައްގުތަކަށް ހުރަސްއެޅިގެންދާކަމަށް ރައީސް ޔާމީން ވަނީ ފާހަގަކުރައްވާފަ އެވެ. 

އެމަނިކުފާނުގެ އިސްތިއުނާފަށް ހުރަސް ނޭޅޭގެ ފަދަ ގޮތަކަށް ދަށި ކޯޓުން ޝަރީއަތްތައް ތާވަލުކޮށްދިނުމަށް ރައީސް ޔާމީން ވަނީ އެދިވަޑައިގެންފަ އެވެ. 

ފުއްގިރި މައްސަލައިގެ އަޑުއެހުންތައް އަންނަ މަހަށް ފަސްކޮށްފައިވާއިރު، މި ހަފްތާގައި އާރަށު މައްސަލައިގެ އިސްތިއުފާނު އަޑުއެހުމެއް ބާއްވާނެކަމަށް ހައި ކޯޓުން ވަނީ ބުނެފައެވެ. އެހެން އެ އަޑުއެހުން ބާއްވާނެ ވަކި ދުވަހެއް އަދި އެ ކޯޓުން ހާމަކޮށްފައެއް ނުވެއެވެ.