ރާއްޖޭގައި ބޮޑުކަންނެލީގެ މަސްވެރިކަން ހީނަރުވަމުން އަންނަކަން ފާހަގަކޮށް ކަންނެލި މަސްވެރިންގެ ހައްޤުތައް ކަށަވަރުކުރުމަށް މަސައްކަތް ކުރަމުން އަންނަ ބޮޑުކަންނެލީގެ މަސްވެރިންގެ ޔޫނިއަނުން ކަންބޮޑުވުން ފާޅުކޮށްފި އެވެ.
އެގޮތުން ބޮޑުކަންނެލީގެ މަސްވެރިންގެ ޔޫނިއަންގެ ރަސްމީ އެކައުންޓުން ކުރި ޓްވީޓެއްގައި ބުނެފައިވަނީ ކަންނެލި މަސްވެރިކަން ކުރުމަށް މިހާރު ފަޅުވެރިން ހޯދުމަކީ ވެސް ދަތިކަމަކަށް ވެފައިވާ ކަމަށެވެ. އަދި އެ ސަބަބާއި ހުރެ ދޯނިތަކަށް ފުރުން ވެސް ދަތިވެފައިވާކަން ކަންނެލި މަސްވެރިންގެ ޔޫނިއަނުން ފާހަގަކުރި އެވެ.
އެއާއެކު އެ ޔޫނިއަނުން ވަނީ މަސްވެރިކަން ރަނގަޅުކުރުމަށް ފިޝަރީޒް މިނިސްޓަރު އެކަށީގެންވާ މަސައްކަތްޕުޅުތަކެއް ކުރައްވަމުން ނުދާކަން ފާހަގަކުރައްވާ މިނިސްޓަރާއި މުހިންމު ސުވާލުތަކެއް ވެސް ކޮށްފަ އެވެ.
"ކަންނެލި މަސްވެރި ކަން ކުރިއަރުވާ ޒުވާނުން މި ދާއިރާއަށް ޝައުގުވެރި ކުރުވަން ވަޒީރު ކުރެއްވީ ކޮންކަމެއްތޯ؟ކަންނެލި މަސްވެރިންނަށް ލިބޭ މަންފާ އިތުރު ކުރަން ކުރެއްވީ ކޮންކަމެއްތޯ؟"
ބީ.ކޭ.އެމް.ޔޫ
ބޮޑުކަންނެލީގެ މަސްވެރިންގެ ޔޫނިއަނުން މިފަދައިން ކަންބޮޑުވުން ފާޅުކޮށްފައިވާއިރު، މަސްވެރި މޫސުމުގައި މަސް ކިރުމާއި، ތާޒާކަންމަތީ މަސް ބެހެއްޓުމަށް އެކަށީގެންވާ މިންވަރަށް އައިސް ނުލިބޭކަމުގެ ޝަކުވާތައް ވެސް މަސްވެރިން ދަނީ ކުރަމުންނެވެ.
އެގޮތުން ފާއިތުވި 3 އަހަރު މަސްވެރިންގެ ދުވަހާއި ދިމާކޮށް މަސްވެރިން ވަނީ ކަނޑުމަތީގައި އިހުތިޖާޖުކޮށްފަ އެވެ.
މި ސަރުކާރަކީ މަސްވެރިންނަށް ގިނަ ވައުދުތަކެއް ވެގެން އައި ސަރުކާރަކަށް ވާއިރު، މިހާތަނަށް މަސްވެރިންގެ މައްސަލަތައް ޙައްލުކޮށް، މަސްވެރިކަމުގެ ސިނާއަތު ކުރިއެރުވުމަށް ސަރުކާރުން ވީ މުހިންމު ވައުދުތައް ފުއްދާފައި ނުވާ ކަމަށް ބުނެ މަސްވެރިން ގެންދަނީ ޝަކުވާ ކުރަމުންނެވެ.
މި ސަރުކާރުން މަސްވެރިންނަށް ވީ ވައުދުތަކުގެ ތެރޭގައި، މަހަށް ހަމަ އަގު ހޯދައިދިނުމާއި، ކަންނެލި ޖަގަހަތައް ޤާއިމްކުރުމާއި، ގޭދޮށު މަސް ފެކްޓްރީ ބިނާކުރުމުގެ އިތުރުން މަސްވެރިން ބާނާ މަހަށް ޑޮލަރުން ފައިސާ ދިނުންފަދަ މުހިންމު ގިނަ ވައުދުތަކެއް ފާހަގަކޮށްލެވެއެވެ.
އެހެން ނަމަވެސް މި ސަރުކާރުން ވައުދުވި ގޮތަށް މަހަށް ހަމަ އަގު ހޯދައި ނުދެވުނުތާގައި، ބާނާ މަސްކޮޅަށް ފައިސާ ނުދީ އެތައް މަހެއްވަންދެން ދިގުދަންމާކަމުގެ ޝަކުވާތައްވެސް މަސްވެރިން ދަނީ ކުރަމުންނެވެ. އަދި އެފަދަ ގިނަ ސަބަބުތަކާއި ހުރެ މަސްވެރިކަމުގެ ސިނާއަތް މި ވެރިކަމުގައި ވަރަށް ބޮޑަށް އަޑިއަޅާލާފައިވާކަން ދާއިރާގައި ހަރަކާތްތެރިވާ ފަރާތްތަކުން ދަނީ ފާހަގަކުރަމުންނެވެ.
Advertisement
This content is created and paid for by advertisers and does not involve Voice Journalists
