ބޮޑު ޚިޔާނާތުގެ ރިޕޯޓްއާއިއެކު މަހުލޫފް ހޫނުފެނަށް

މިއަދު އޭސީސީން އާންމުކުރި އެމްއެމްޕީއާރްސީގެ ބޮޑު ޚިޔާނާތުގެ ރިޕޯޓްއާއި އެކު އެ ފައިސާތައް ވަން އެކައުންޓްތައް އާންމުންނަށް ތިލަވެގެންދިޔައެވެ.

މި އެކައުންޓްތަކުގެ ލިސްޓުން އެންމެ ބޮޑަށް އާންމުންގެ ލޮލުގައި އަޅައިގަތް އެކައުންޓަކީ މިސަރުކާރުގެ ޔޫތު މިނިސްޓަރ އަހުމަދު މަޚުލޫފްގެ އެކައުންޓެވެ. މަޚުލޫފްގެ އަމިއްލަ އެކައުންޓަށް، އެމްއެމްޕީއާރްސީގެ ޚިޔާނާތުގެ ފައިސާތައް ވަން އެސްއޯއެފްއިން 33،000ޑޮލަރ ޖަމާކުރިކަމަށް އެ ރިޕޯޓްގައި ވަނީ ފާހަގަކޮށްފައެވެ.

މިއާއި އެކު މުޅި ސޯޝަލް މީޑިޔާ ކެކިގެންދިޔައެވެ. ކޮރަޕްޝަނާއި ދެކޮޅަށް އަބަދުމެ ވަކާލާތު ކުރެއްވި މަޚުލޫފްގެ ފަރާތުން މިކަމާއި މެދު ކޮމެންޓަކަށް ގިނަ ފަރާތްތަކުން އެދެމުންދިޔައެވެ. އެހެންކަމުން މަޚުލޫފްވަނީ ބަޔާނެއް ނެެރުއްވާފައެވެ. އެމްއެމްޕީއާރްސީގެ ރިޕޯޓުގައި ނަންފެވިފައިވާ ފަރާތްތަކުގެ ތެރެއިން އެންމެ ފުރަތަމަ އެކަމުގެ ތަފްސީލް ދެއްވީ މަހުލޫފްކަން ފާހަގަކޮށްލެވެއެވެ.

މަޚުލޫފް ވިދާޅުވިގޮތުގައި އެސްއޯއެފްގެ ޚިޔާނާތުގެ ފައިސާ ދިޔަ އެކައުންޓްތަކުގެ ތެރޭގައި އޭނާގެ އެކައުންޓް އިންކަން ދާދިފަހުން އެނގުމުން އެ މައްސަލަ އޭސީސީއަށް ހުށައަޅުއްވާފައިވާކަމަށެވެ.

https://voice.mv/2460

އެސްއޯއެފްެއާއި އެކު މުއާމަލާތްކުރެވުނީ މީގެ ފަސް އަހަރުކުރިން 2014ވަނަ އަހަރުގައިކަމަށް މަޚުލޫފް ވަނީ ފާހަގަކުރައްވާފައެވެ. އެއީ މަޚުލޫފްގެ އާއިލާއިން ދަޖީންސް ކިޔާ ފިހާރަ ހިންގިއިރުގައި، މަހުލޫފްގެ އެއްބަަފާ ކޮއްކޮ އަލީ މުބީން މެދުވެރިކޮށް ނަގުުދު ފައިސާ ދީފައި ޑޮލަރ ގަންނަން ކުރި މުއާމަލާތެއްކަމުގައިވަނީ އެބޭފުޅާ ވަނީ ފާހަަގަކުރައްވާފައެވެ.

އަދި އެ ޑޮލަރތައް މަހުލޫފްގެ އަމިއްލަ ޑޮލަރ އެކައުންޓަށް ޖަމާކޮށްފައިވަނީ ދަޖީންސް ފިހާރައިގެ ޑޮލަރ އެކައުންޓެއް ނެތުމުންކަމަށް މަޚުލޫފް ވަނީ ވިދާޅުވެފައެވެ.

ނަމަވެސް އެސްއޯއެފްއާއި އެކު މަޚުލޫފް މި މުއާމަލާތްކުރައްވާފައިވަނީ އެސްއޯއެފްއަށް ބޭރުފައިސާ ގަނެވިއްކުމުގެ ހުއްދަ ލިބުމުގެ މާކުރިންކަން ފާހަގަކޮށްލެވެއެވެ.

ވޮއިސްއަށް މައުލޫމާތު ދެއްވަމުން އޭސީސީގެ ނައިބު ރައީސް މުއައްވިޒް ރަޝީދު ވިދާޅުވީ، އެސްއޯއެފް ޕްރައިވެޓް ލިމިޓެޑަށް ބޭރު ފައިސާ ގަނެވިއްކުމުގެ ހުއްދަ ލިބުނީ 2015ވަނަ އަހަރުގެ ޖެނުއަރީމަހުގެ 13 ވަނަ ދުވަހުގައި ކަމަށެވެ. ނަމަވެސް އެމްއެމްޕީއާރްސީގެ ތަހުގީގުގެ ކަންކަން ނިމުމާއި އެކު، އެމްއެމްއޭގެ ފަރާތުން އެ ހުއްދަ ބާތިލްކުރިކަމަށް މުއައްވިޒް ވަނީ ވިދާޅުވެފައެވެ.

https://voice.mv/2467

އެ ހުއްދަ ބާތިލްކުރެވިފައިވަނީ 2016ވަނަ އަހަރުގެ ޖޫންމަހުގެ 21ވަނަ ދުވަހުގައެވެ. އެހެންކަމުން މި މުއާމަލާތަކީ ކަޅު ބާޒާރުގައި ޑޮލަރ ގަނެވިއްކުންކަމުގައި ބުނުމުގެ ޖާގަ އެބައޮތެވެ.

އެމްއެމްޕީއާރްސީގެ ބޮޑު ޚިޔާނާތުގެ މައްސަލައިގައި ހިމެނޭ އެސްއޯއެފް ކުންފުނިން ލިބިފައިވާ ކަމަށް ތަހުގީގު ރިޕޯޓުން ދައްކާ ޑޮލަރުތަކުގެ މައްސަލަތައް ބަލައި ނިމެންދެން ޔޫތު މިނިސްޓަރ އަހުމަދު  މަޚުލޫފް މިހާރުވަނީ ގޭގައި މަޑުކުރުމަށް އަންގައިފިއެވެ.

މަގާމުގެ މަސްއޫލިއްޔަތުތަކުން މަހުލޫފް ވަގުތީ ގޮތުން ދުރުކޮށް، ގޭގައި މަޑުކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެންގެވިކަން މަހުލޫފްވަނީ ޓްވިޓަރ މެދުވެރިކޮށް ކަށަވަރުކޮށްދެއްވާފައެވެ.