އެކަނި މަހަށް ނިކުމެ އުޅުނު ދަނގެތީ މީހަކު ގެއްލިގެން ހޯދަން ފަށައިފި އެވެ. 

ގެއްލިގެން ހޯދަމުންދަނީ ދަނގެތި، ނޫލައިޓް، އުމުރުން 68 އަހަރުގެ ޔޫސުފް އިބްރާހިމެވެ.

އެކަމާއި ގުޅޭގޮތުން ދަނގެތީ ކައުންސިލްގެ ރައީސް މުއާވިޔަތު ރަޝީދު ވިދާޅުވީ ގެއްލިގެން ހޯދަމުންދާ ޔޫސުފް އިބްރާހިމް މަހަށް ނިކުތީ އޭނާގެ އަމިއްލަ ދޯނީގައި ކަމަށެވެ. އޭނާ މަހަށް ނިކުތް ދޯނި އޮޔާދަނިކޮށް ފެނިފައިވާ ކަމަށާއި، އެހެން ނަމަވެސް ޔޫސުފް އިބްރާހިމްގެ ޚަބަރެއް ނެތްކަމަށް މުއާވިޔަތު ވިދާޅުވި އެވެ. 

Advertisement

ދޯނި އޮޔާދަނިކޮށް ފެނިފައިވަނީ ވެލިނަގަން ގޮސްއުޅުނު ބަޔަކަށް ކަމަށާއި، އެމީހުން ބެލި ބެލުމުން އޭގައި ހުރިހާ އެއްޗެއް ހުރިކަމަށް ކައުންސިލްގެ ރައީސާއި ހަވާލާދީ ޕީއެސްއެމް ނިއުސްގައި ރިޕޯޓުކޮށްފައި ވެއެވެ. އަދި މިހާރު އެ މީހާ ހޯދުމުގެ މަސައްކަތް ވަނީ ފަށާފައެވެ. 

ދަނގެތީ ކައުންސިލްގެ ރައީސް މައުލޫމާތު ދެއްވި ގޮތުގައި ޔޫސުފް އިބްރާހިމް ގެއްލިގެން ހޯދުމުގެ މަސައްކަތް ފަށާފައިވަނީ މިއަދުގެ 11 ޖެހިކަން ހާއިރުގަ އެވެ. އަދި މިހާރު ފުލުހުންނާއި ގައުމީ ދިފާއީ ބާރުންވެސް ގެންދަނީ އޭނާ ހޯދުމުގެ މަސައްކަތް ކުރަމުންނެވެ. 

އޭގެ އިތުރުން ދަނގެތީގެ ބައެއް ފޯނިފަހަރުތަކުން ވެސް ދަނީ ޔޫސުފް އިބްރާހިމް ހޯދުމުގެ މަސައްކަތް ކުރަމުންނެވެ.