ބޮޑުކަންނެލި މަސްވެރިންގެ ޔޫނިއަން އާއި މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް ބައްދަލު ކުރައްވައިފިއެވެ.

މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ބުނީ މި ބައްދަލުވުމުގައި ބޮޑުކަންނެލީގެ މަސްވެރިކަމުގައި ދިމާވަމުންދާ ދަތިތަކާއި، މަސްވެރިންގެ ކަންބޮޑުވުންތައް ޔޫނިއަންގެ ފަރާތުން މިނިސްޓަރާއި ހިއްސާ ކޮށްފައިވާ ކަަމަށެވެ.

މިކަމާއި ގުޅޭގޮތުން ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) ގެ ފަރާތުން އެކްސްގައި ކުރި ޕޯސްޓެއްގައި ބުނީ ބީކޭއެމްޔޫ އާއި ފިޝަރީޒް މިނިސްޓަރ އާއި އެކު މިއަދު ބޭއްވުނު ބައްދަލުވުމުގައި ކަންނެލި މަސްވެރިންނަށް ދިމާވެފައިވާ ހުރިހާ ދަތިތަކާއި ބެހޭގޮތުން މަޝްވަރާ ކުރެވުނު ކަމަށެވެ. ވަކިން ހާއްސަކޮށް ތެލުގެ އަގު މަސްވެރިންނަށް ހެޔޮކޮށް ދެއްވުމަށް އެދެވުނު ކަމަށްވެސް ބީކޭއެމްޔޫއިން ބުނެފައި ވެއެވެ.

Advertisement

މަސްވެރިކަމުގެ ސިނާއަތަށް ކުރިއެރުން ހޯދުމަށް މަސައްކަތް ކުރުމަކީ ރައީސް ޑރ.މުއިއްޒުގެ ހަފްތާ 14 ގައި ވެސް ވަރަށް ބޮޑު އިސްކަމެއް ދީފައިވާ ކަމެކެވެ. މިގޮތުން ހަފްތާ 14 ގައި މި ސިނާއަތަށް ކުރިއެރުން ގެނައުމަށް ކުރުމަށް ހަމަޖެހިފައިވާ ކަންކަމުގެ ތެރޭގައި މިފްކޯ ހިންގުމުގައި މަސްވެރިންގެ ދައުރު ފުޅާ ކުރުމާއި، މަސްވެރިންގެ ގައުމީ ދަފުތަރެއް އެކުލަވާ ލުމުގެ ގޮތުން، ދަފްތަރުގައި ރަޖިސްޓްރީ ވުމުގެ ފުރުސަތު ހުޅުވާލުމުގެ އިތުރުން މަސްވެރިކަމުގެ ދާއިރާގެ އުފެއްދުންތައް މާކެޓު ކުރުމަށް ޚާއްސަ އެޖެންސީއެއް އުފެދުންވެސް ހިމެނެއެެވެ.