ބ.ކިހާދޫ ކައުންސިލުން އެދުނު ފަދައިން، އެރަށުގައި އޮފީސް ކޮމްޕްލެކްސް އިމާރާތެއް އަޅުއްވައިދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ އެމަނިކުފާނު ބ އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން އެ އަތޮޅު ކިހާދޫ ކައުންސިލާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީ އާއި ބައްދަލުކުރައްވާ ދެއްކެވި ވާހަކަފުޅުގައެވެ.

މި ބައްދަލުވުމުގައި، ކިހާދޫ ކައުންސިލުން ވަނީ އެ ރަށުގެ ރަށް ގިރުމުގެ މައްސަލަ ފާހަގަކޮށްފައެވެ. އަދި ރަށުގެ އިންޖީނުގެ އެހެން ސަރަޙައްދަކަށް ބަދަލުކުރަން ބޭނުންވާކަމަށް ވެސް ކައުންސިލުން ވަނީ ދަންނަވާފައެވެ.

Advertisement

މީގެ އިތުރުންވެސް، ފެނާ ނަރުދަމާ ނިޒާމު ޤާއިމުކުރުމުގެ މަސައްކަތް ހުއްޓިފައި އޮތުމުގެ ކަންބޮޑުވުމުގެ އިތުރުން، ރަށު ކައުންސިލުގެ އިމާރާތުގެ ދަތިކަމާއި، އެރަށުގެ ބިމުގައި ދިގުމުއްދަތަށް ދޫކޮށްފައިވާ ބައެއް ތަންތަނާ ގުޅޭ އެކަށީގެންވާ މަޢުލޫމާތުތައް ކަމާބެހޭ ސަރުކާރުގެ އިދާރާތަކުން ކައުންސިލަށް ނުލިބޭތީ، އެކަމުގެ ކަންބޮޑުވުން ވެސް ކައުންސިލުން ވަނީ ރައީސް ޑރ.މުއިއްޒު އާއި ހިއްސާ ކުރައްވާފައެވެ.

 ތިމާވެށީގެ ގޮތުންނާއި ޚާއްސަކޮށް މަސްވެރިކަމަށް އެންމެ ރަނގަޅު ބައެއް ސަރަޙައްދުތައް އެހެން ބޭނުންތަކަށް ދޫކޮށްފައިވާތީ، އެކަމާއި ގުޅިގެން ކިހާދޫ ކައުންސިލުން ކަންބޮޑުވުން ފާޅުކޮށްފައިވާއިރު، ކިހާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވަނީ އެކޮމިޓީއަށް ލިބޭ ބަޖެޓަކީ އެކަށީގެންވާ އަދަދަކަށް ނުވާތީ އެކަމުގެ ކަންބޮޑުވުން ވެސް މި ބައްދަލުވުމުގެ ތެރެއިން ފާޅުކޮށްފައެވެ.

މިކަންކަމާއި ގުޅިގެން ރައީސް ޑރ.މުއިއްޒު ވިދާޅުވީ، ކައުންސިލުން އެދިވަޑައިގަތް ގޮތަށް އޮފީސް ކޮމްޕްލެކްސް އިމާރާތަކާއި އަދި ކައުންސިލުން ފާހަގަކުރެއްވި އިތުރު ކަންތައްތައްވެސް ހަމަޖައްސައިދެއްވާނެކަމުގައި ވިދާޅުވެފައެވެ.