އޯލެވެލް އިމްތިހާނުގައި ތިން މާއްދާއިން ފާސްވެފައިވާ ނަމަވެސް، ސަރުކާރުގެ ސްކޫލްތަކުގައި އޭލެވެލަށް ކިޔެވޭނެ ގޮތަށް އުސޫލު ބަދަލުކުރުމަށް އެޑިއުކޭޝަން މިނިސްޓްރީން މިއަދު ނިންމައިފިއެވެ.

މި ނިންމުމާ ގުޅިގެން މިނިސްޓްރީން ވަނީ ހުރިހާ ސްކޫލުތަކަށް ސާކިއުލާއެއް ފޮނުވައި، ގްރޭޑް 11 އަދި 12 ގައި ކިޔެވުމުގެ އުސޫލަށް ބަދަލު ގެނެސްފައިވާކަން އަންގާފައެވެ.

މީގެ ކުރިން ސަރުކާރުގެ ސްކޫލްތަކުގައި އޭލެވެލަށް ކިޔަވަން ފުރުސަތު ދެމުން އައީ އޯލެވެލް އިމްތިހާނުގައި މަޖުބޫރު ހަތަރު މާއްދާއާއި އިތުރު އެއް މާއްދާއަކާ އެކު، ޖުމުލަ ފަސް މާއްދާއިން ދަށްވެގެން ސީ ފާސް ލިބިގެންނެވެ. ނަމަވެސް މި އައު ބަދަލާ އެކު، ތިން މާއްދާއިން ފާސްވެފައިވާ ދަރިވަރުންނަށްވެސް އޭލެވެލަށް ވަނުމުގެ ފުރުސަތު ލިބިގެންދާނެއެވެ.

އައު އުސޫލުގެ ދަށުން، އަންނަނިވި ހަތަރު ޝަރުތުންކުރެ ކޮންމެވެސް އެއް ޝަރުތެއް ފުރިހަމަވާ ދަރިވަރުންނަށް އޭލެވެލަށް ވަނުމުގެ ފުރުސަތު ލިބޭނެއެވެ:

1. އޯލެވެލް އިމްތިހާނުގައި ދިވެހި ނުވަތަ އިސްލާމް މާއްދާއިން ދަށްވެގެން ސީ ފާހެއް ލިބުމާއެކު، ސައިންސް ނުވަތަ ބިޒްނަސް ސްޓްރީމުން މަދުވެގެން ދެ މާއްދާއިން ދަށްވެގެން ސީ ފާހެއް ލިބުމާއެކު، އިތުރު އެއް މާއްދާއިން ދަށްވެގެން ސީ ފާހެއް ހޯދުން.

2. އޯލެވެލް އިމްތިހާނުގައި ތިން މާއްދާއިން ދަށްވެގެން ސީ ފާހެއް ލިބިފައިވުން.

3. އިންޑިވިޖުއަލް އެޑިއުކޭޝަން ޕްލޭނެއްގެ ދަށުން (އައިއީޕީ) އިމްތިހާނު ހަދާ ދަރިވަރުން ނިންމާ އިމްތިހާނުގައި ބައިވެރިވި މާއްދާތަކުގެ ތެރެއިން ދެ މާއްދާއިން ދަށްވެގެން ސީ ފާހެއް ލިބިފައިވުން.

4. ކުދިން ކިޔަވަން ބޭނުންވާ މާއްދާ ނުވަތަ މާއްދާތަކުން ސާނަވީ ނިންމައި އިމްތިހާނަކުން ދަށްވެގެން ސީ ފާހެއް ލިބިފައިވުން.

އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ މި ބަދަލު ގެނެސްފައިވަނީ ސަރުކާރުގެ ސްކޫލްތަކުގައި ޖާގަ ހުރި ނަމަ، ވީހާވެސް ގިނަ ކުދިންނަށް ފުރުސަތު ދިނުމުގެ މަޤްޞަދުގައި ކަމަށެވެ. މިއީ ކުރިން ގްރޭޑް 11 އަދި 12 އަށް ވަދެވޭ ކްރައިޓީރިއާގެ އިތުރުން ގެނެސްފައިވާ ބަދަލެއް ކަމަށްވެސް މިނިސްޓަރު ފާހަގަކުރެއްވިއެވެ.