އެމްޑީޕީން މިރޭ ކާނިވާ ސަރަހައްދުގައި ބާއްވާ ޖަލްސާއަކީ ސަރުކާރުން ކަންކަން ކުރަމުންދާ ގޮތާމެދު ރައްޔިތުންގެ ޝުއޫރު ފާޅުކުރުމަށް ބާއްވާ ޖަލްސާއެއް ކަމަށާއި، އެނޫން މަގްސަދެއް ނެތްކަމަށް އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.
އެމްޑީޕީން އިއްޔެ ބެއްވި ނުސްވެރިންގެ ބައްދަލުވުމުގައި ކުރީގެ ރައީސް މުހައްމަދު އަމީން އާ ގުޅުވައިގެން ދެއްކި ވާހަކަތަކާ ގުޅިގެން ބައެއް ސިޔާސީ ފަރާތްތަކުން ދަނީ ފައްޔާޒުގެ އެ ވާހަކަތައް ވަރަށްބޮޑަށް ކުށްވެރިކުރަމުންނެވެ. އެ ވާހަކަތަކާ ގުޅިގެން މިއަދު މަޖިލީހަށްވެސް އެ މައްސަލަ ގޮސްފައިވާއިރު، ރާއްޖެ ޓީވީގައި މިއަދު ވާހަކަދައްކަވަމުން ފައްޔާޒް ވިދާޅުވީ، އެމްޑީޕީން މިރޭ ބާއްވާ ޖަލްސާއަކީ ހަމައެކަނި ރައްޔިތުންގެ ޝުއޫރުތައް ފާޅުކުރުމަށް ބާއްވާ ޖަލްސާއެއް ކަމަށެވެ.
ފައްޔާޒް ވިދާޅުވީ ކުރީގެ ރައީސް އަމީން އާ ގުޅުވައިގެން ދެއްކެވި ވާހަކަތައް ވަރަށްބޮޑަށް އޮޅުވާލައިގެން ދައްކަމުންދާކަމަށާއި، ދެއްކެވި ހަމައެކަނި ވާހަކައަކީ އަމީންގެ ވެރިކަން ވެއްޓުނު ގޮތުގެ ވާހަކަ ކަމަށެވެ.
އިދިކޮޅު ފަރާތްތަކުން ޖަލްސާ ބޭއްވިއަ ނުދިނުމަށް އެކިގޮތްގޮތުން މަސައްކަތް ކުރަމުންދާކަން ފާހަގަކުރައްވަމުން ފައްޔާޒް ވިދާޅުވީ، މިއުޅެނީ ހަމަނުޖެހުމެއް ހިންގަން ނޫންކަމަށާއި ކުރަން މިއުޅޭކަމަކީ ގާނޫނު އަސާސީން ލިބިދީފައިވާ ހައްގުގެ ދަށުން ރައްޔިތުންގެ ހުރި ކަންބޮޑުވުންތައް ސަރުކާރަށް އަޑުއިއްވަން ކަމަށެވެ. އިދިކޮޅުގެ ބޭނުމަކީ މިރޭ ބާއްވާ ޖަލްސާއަށް ދާނެ ރައްޔިތުން މަދުކުރުން ކަމަށާއި ރައްޔިތުންގެ ޝުއޫރުތައް ހުރިގޮތް މިހާރު ކޮންމެވެސް ވަރަކަށް ސަރުކާރަށް އެނގޭކަމަށެވެ.
އެބޭފުޅުން (ސަރުކާރު) ބޭނުންނުވަނީ ރައްޔިތުން ބިރުފަހަނަ އަޅައި ގޮސް އެ ނުރުހުން އޮތްކަން ރަސްމީކޮށް ފެންނަން
ފައްޔާޒް ވިދާޅުވިއެވެ
ފައްޔާޒް ވިދާޅުވީ ހަމަޖެހިފައިވާ ގޮތަށް މިރޭ 20:30 ގައި ކާނިވާ ސަރަހައްދުގައި ޖަލްސާ ފެށޭނޭ ކަމަށާއި، ސަރުކާރަށް ޖަލްސާ ނުހުއްޓުވޭނޭ ކަމަށެވެ. ޖަލްސާގައި އެއްވެސް ހަމަނުޖެހުމެއް ހިންގަން ފުރުސަތު ނޯންނާނޭކަން ފާހަގަކުރައްވަމުން ފައްޔާޒު ވިދާޅުވީ ޖަލްސާ ބާއްވާ ސަރަހައްދުގައި ރައްޔިތުން ޝުއޫރު ފާޅުކުރުމުގެ ގޮތުން ހަރަކާތްތަް ކުރިއަށްދާނޭ ކަމަށެވެ.
Advertisement
This content is created and paid for by advertisers and does not involve Voice Journalists
