އާސަންދަ ސްކީމްގެ ދަށުން ހިދުމަތް ދިނުމަށް އާސަންދަ ކުންފުނިން، ދުބާއީ އަދި ތައިލެންޑްގެ ދެ ހޮސްޕިޓަލަކާއެކު އެއްބަސްވުމުގައި ސޮއިކޮށްފިއެވެ.

އާސަންދައިގެ ދަށުން ރާއްޖޭގެ ބޭރުގެ ހޮސްޕިޓަލްތަކުން ފަރުވާ ކުރެވޭނެ އިންތިޒާމް ހަމަޖެއްސުމަކީ މި ސަރުކާރުގެ ސިޔާސަތެކެވެ. އާސަންދައިން މިއަދު ތައިލެންޑްގައި ދިވެހިންނަށް ހިލޭ ބޭސްފަރުވާ ކުރެވޭނެ އިންތިޒާމު ހަމަޖެއްސުމަށް އެއްބަސްވުން ގާއިމްކޮށްފައިވަނީ، އެޤައުމުގެ ބެންކޮކް ހޮސްޕިޓަލުގެ އިތުރުން ބެންކޮކްގެ، ދަ ވޯރލްޑް މެޑިކަލް ހޮސްޕިޓަލާ އެކުއެވެ.

ދުބާއީން ސޮއިކޮށްފައިވަނީ ބުރްޖީލް މެޑިކަލް ސިޓީ އާއެކު އެވެ. އާސަންދައިގެ ފަރާތުން މި ހުރިހާ އެއްބަސްވުންތަކުގައިވެސް ސޮއިކޮށްފައިވަނީ، އެ ކުންފުނީގެ މެނޭޖިން ޑިރެކްޓަރު އައިމިނަތު ޒީނިއާއެވެ.

މިއަހަރުގެ ޖެނުއަރީމަހު ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގެން އެއަރޕޯޓްގައި ނޫސްވެރިންނާ ވާހަކަދައްކަވަމުން ރައީސް ޑރ.މުއިއްޒު ވިދާޅުވެފައިވަނީ، ޔޫއޭއީ އާއި ތައިެލންޑުން އާސަންދަ ލިބޭނޭ އިންތިޒާމު ހަމަޖައްސަވާނޭކަމަށެވެ. ރައީސް ވިދާޅުވެފައިވަނީ، މިހާރު އާސަންދަ ލިބޭ ގައުމުތަކަށް ވުރެ މާ ފެންވަރު ރަނގަޅު، މާ މަތީ ފަންތީގެ ގައުމުތަކުން އާސަންދަ ލިބޭގޮތް ހަމަޖައްސަން މަސައްކަތްކުރައްވާނެ ކަމަށެވެ

އެދުވަހު ރައީސް ވަނީ، ސަރުކާރުގެ އަމާޒަކީ އެ ތަންތަނަށް ދަތުރުކުރާއިރު ހުރުމަށްދާ ޚަރަދު ވެސް އާސަންދައިގެ ތެރެއިން ކަވަރުވާނެގޮތް ހެއްދެވުން ކަމަށެވެ.

ކުރިއަށްއޮތް ދުވަސްތަކުގެ ތެރޭގައި އާސަންދައަށް ސަލާންޖަހަން ނުޖެހޭ ހަރުދަނާ އެދެވޭފަދަ ބަދަލެއް ގެންނާނޭކަމަށް ސަރުކާރުން ވަނީ ހާމަކޮށްފައެވެ. އާސަންދައިގެ ދަށުން މިހާރު ދިވެހިންނަށް ހަމައެކަނި ބޭސްފަރުވާގެ ކަންކަމުގައި ދެވެނީ އިންޑިއާ އަދި ލަންކާއަށެވެ.