މިހާރު މިއޮތް ސަރުކާރުން އަދި ސްޕްރީމްކޯޓުގެ ބެންޗުވެސް ބަދަލުކުރާނޭކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އިދިކޮޅު މައި ޕާޓީ، އެމްޑީޕީން މިރޭ ކާނިވާ ސަރަހައްދުގައި ކުރިއަށްދާ "ގާނޫނު އަސާސީގެ ދިފާއުގައި" ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، މި ސަރުކާރު މިސްރާބު ޖަހާފައިވަނީ ހުދުމުހުތާރު ވެރިކަމަކާ ދިމާލަށް ކަމަށެވެ. މިގޮތުން ސަރުކާރުގެ އަމަލުތައް މިހާހިސާބަށް އާއިރު ހުރީ އެބީދައިންކަމަށް ރައީސް ސޯލިހު ފާހަގަކުރެއްވިއެވެ.

ޤާނޫނު އަސާސީއަށް މިފަހުން މަޖިލީހުގެ މެޖޯރިޓީ ބާރު ބޭނުންކުރައްވައިގެން ފާސްކުރެއްވި އިސްލާހުތަކަށް ވަރަށްބޮޑަށް ފާޑުވިދާޅުވެ ވާހަކަދައްކަވަމުން ރައީސް ސޯލިހު ވިދާޅުވީ މި ސަރުކާރުން ދެން މަސައްކަތްކުރާނީ ސްޕްރީމް ކޯޓުގެ ބެންޗު ބަދަލުކުރަން ކަމަށެވެ. 

ނިމިގެންދިޔަ އެމްޑީޕީ ވެރިކަމުގައި ރައީސްކަމުގެ މަގާމު ފުރުއްވި ރައީސް ސޯލިހު ވިދާޅުވީ މި ސަރުކާރުގެ ހަގީގީ ސިފަ ފެނިގެންދާނީ ސްޕްރީމް ކޯޓުގެ ބެންޗަށް ބަދަލުގެންނަ ހިސާބުން ކަމަށެވެ. މިވީ އަހަރެއްހާ ދުވަހުގެ ތެރޭގައި މި ސަރުކާރުން ވަނީ މިނިވަން މުއައްސަސާތަކުގެ ބާރުތައް އަތުލައި، މަޖިލީސް ހިސޯރުކޮށް، ބޭންކުގެ ތެރެއަށް އަތްބާނައި ހދުމުހުތާރު ވެރިކަމެއް ކުރުމަށް އަޅަންޖެހޭނެ ހުރިހާ ފިޔަވަޅުތަކެއް އަޅާފައިކަން ރައީސް ސޯލިހު ފާހަގަކުރެއްވިއެވެ. 

ރައީސް ސޯލިހު ވިދާޅުވީ މި ސަރުކާރުން މަރުކަޒީ ބޭންކުގެ ބާރުތައް ރައީސް އޮފީހަށް ނަގައި، މަނިޓަރީ ޕލިސީގެ މިނިވަންކަން މުޅިން ނައްތާލައި ބޭންކް އޮފް މޯލްޑިވްސްގެ ތެރެއަށް އަތްބާނައި ބޭންކުގައި ރައްޔިތުން ފަހަށް ރައްކާކުރަން ބަހައްޓާފައި ހުރި ފައިސާކޮޅާމެދުވެސް އިތުބާރު ގެއްލޭ ގޮތަށް ކަންކަންކޮށްފައިވާކަމަށެވެ. 

ރައީސް ސޯލިހު ވިދާޅުވީ، ހިޔާލުފާޅުކުރުމުގެ މިނިވަންކަމަށް ކިތަންމެ ދަތިކުރި ނަމަވެސް ސަރުކާރު ޖަވާބުދާރީކުރަން އިދިކޮޅު އެމްޑީޕީން ނިކުންނާނޭކަމަށެވެ.