ބ. އޭދަފުށީ ކައުންސިލުން ރަށުގައި ގެސްޓް ހައުސް ތަރައްޤީކޮށް ހިންގައިދޭނެ ފަރާތެއް ހޯދުމަށް ކުރި އިޢުލާނާ ގުޅިގެން އެއްވެސް ފަރާތަކުން ބިޑް ފޮތް ގަނެފައި ނުވާތީ، އެ އިޢުލާނު ބާޠިލުކޮށް އަލުން އިޢުލާނު ކޮށްފިއެވެ.

މި އިޢުލާނުގައިވާ ގޮތުން، ގެސްޓް ހައުސް ހެދުމަށް ބ. އޭދަފުށީގެ ލޭންޑް ޔޫސް ޕްލޭންގައި ފާހަގަކޮށްފައިވާ 10،000 އަކަފޫޓުގެ ދެ ބިން 50 އަހަރު ދުވަހުގެ މުއްދަތަށް ކުއްޔަށް ދޫކުރުމަށް ވަނީ ހަމަޖެހިފައެވެ. މި ދެ ބިން ދެ ބިޑް ފޮތެއްގެ ގޮތުގައި ވިއްކުމަށް ވެސް ވަނީ ނިންމާފައެވެ.

މި ބިންތަކުގައި އަމިއްލަ ޚަރަދުގައި ގެސްޓް ހައުސް އިމާރާތްކޮށް، ހިންގައި، ބަލަހައްޓައި އަދި އޮޕަރޭޓްކުރުމަށް ޝައުޤުވެރިވާ ފަރާތްތަކަށް ބިޑް ޑޮކިއުމަންޓް  ގަތުމުގެ ފުރުޞަތު ވަނީ 5 ޑިސެންބަރު 2024 އިން ފެށިގެން 5 ޖެނުއަރީ 2025 އަށް ހުޅުވާލާފައިވެއެވެ. ބިޑް ޑޮކިއުމަންޓް ވިއްކުމަށް ހަމަޖެހިފައިވަނީ 10،000 ރުފިޔާއަށެވެ.

މަޢުލޫމާތު ސާފުކުރުމުގެ ފުރުޞަތު 6 ޖެނުއަރީ 2025 އިން 9 ޖެނުއަރީ 2025 އަށް ދެވޭނެ ކަމަށް އިޢުލާނުގައި ބަޔާންކޮށްފައިވެއެވެ. އަދި ބިޑު ހުށަހެޅުމުގެ ސުންގަޑިއަކީ 13 ޖެނުއަރީ 2025 ވާ ހޯމަ ދުވަހުގެ މެންދުރު 13:00 ކަމަށް ވެސް ބަޔާންކޮށްފައިވެއެވެ.

މި ބީލަމުގައި ބައިވެރިވުމުގެ ފުރުޞަތު ލިބިގެންވަނީ ދިވެހި ރައްޔިތުންނަށް ނުވަތަ ދިވެހިރާއްޖޭގައި ރަޖިސްޓްރީކޮށްފައިވާ ޕާޓްނަރޝިޕްތަކަށް ނުވަތަ ކުންފުނިތަކަށެވެ. އަދި ބިޑް ޑޮކިއުމަންޓް ގަތުމަށް އެދޭ ފޯމާއެކު ހުށަހަޅަންޖެހޭ ލިޔެކިޔުންތަކުގެ ތަފްޞީލު ވެސް އިޢުލާނުގައި ހިމަނާފައިވެއެވެ.