ޤައުމީ އެއަރލައިން މޯލްޑިވިއަން އިން އަންނަ އަހަރުގެ ޖަނަވަރީ މަހުން ފެށިގެން ޗައިނާގެ 4 ސިޓީއަކަށް ސީދާ ދަތުރުތައް ފަށާ ކަމަށް އިއުލާން ކޮށްފިއެވެ. މި ދަތުރުތައް ފަށާނީ މޯލްޑިވިއަންގެ އައު އޭ330-200 ވައިޑްބޮޑީ މަތިންދާބޯޓުންނެވެ.މޯލްޑިވިއަންގެ އެކްސް އެކައުންޓުން ހިއްސާކުރި މައުލޫމާތުގައިވާ ގޮތުން، މާލެއިން ބެއިޖިންގ، ޝަންގހާއީ، ޗެންގދޫ އަދި ޝީއާން އަށް ސީދާ ދަތުރުތައް ފެށުމަށް ވަނީ ހަމަޖެހިފައެވެ. މި ދަތުރުތައް ފެށުމުގެ ރަސްމިއްޔާތު ބޭއްވުނީ ބެއިޖިންގ ގައެވެ.

މި ރަސްމިއްޔާތުގައި ޓްރާންސްޕޯޓް މިނިސްޓަރ މުހައްމަދު އަމީންގެ އިތުރުން ދިވެހިރާއްޖެ އާއި ޗައިނާގެ އިސް ފަރާތްތަކުން ބައިވެރިވެ ވަޑައިގަތެވެ.

މި ރަސްމިއްޔާތުގައި ބައިވެރިވެ ވަޑައިގަތުމަށްފަހު އެކްސްގައި ކުރެއްވި ޕޯސްޓެއްގައި ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވީ މިއީ ރާއްޖޭގެ ޓޫރިޒަމަށް ދިރުން އަންނާނެ ކަމެއް ކަމަށެވެ. އަދި މި ދަތުރުތަކުގެ ސަބަބުން ދެ ޤައުމުގެ ދެމެދުގައި ފަތުރުވެރިކަން އިތުރުވެގެންދާނެ ކަމަށް އުއްމީދު ކުރައްވާ ކަމަށް ވެސް ވިދާޅުވިއެވެ.

މޯލްޑިވިއަންގެ ފަރާތުން މި ދަތުރުތަކާ ގުޅޭ އިތުރު މައުލޫމާތު ކުރިއަށް އޮތް ދުވަސްތަކުގައި ހާމަކުރާނެ ކަމަށް ބުނެފައިވެއެވެ. މިއީ މޯލްޑިވިއަންގެ ވިއުގަ ފުޅާކުރުމުގެ މަސައްކަތުގެ ތެރެއިން އަޅާ އިތުރު ފިޔަވަޅެކެވެ.