ރައްޔިތުންގެ މަސްލަހަތުގައި މަސައްކަތްކުރުމުގެ ސަބަބުން ނުވަތަ އެމްޑީޕީއިން އެ މަގުސަދުގައި ހިންގާ ހަރަކާތަކަށް އެއްބާރުލުން ދިނުމުގެ ސަބަބުން މަޖިލިސް މެމްބަރަކު، މެމްބަރުކަމުން ވަކިކޮށްފި ހާލަތުގައި އެ މީހަކު އަލުން އިންތިހާބުކޮށްދިނުމަށް މަސައްކަތްކޮށްދިނުމަށްޓަކައި އެމްޑީޕީގެ ގައުމީ މަޖިލީހަށް ގަރާރެއް ފާސްކޮށްފިއެވެ.
އެމްޑީޕީން ރޭ 'ގާނޫނު އަސާސީގެ ދިފާއުގައި'ގެ ނަމުގައި ޖަލްސާ ބޭއްވުމުގެ ކުރިން، ގައުމީ މަޖިލީހުގެ ޖަލްސާއެއް ބާއްވާފައި ވާއިރު، އެ ޖަލްސާގައި ވަނީ ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ވެސް މެންބަރުކަން ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ދެކޮޅަށް ގަރާރަކާއި ޕެޓިޝަނެއް ފާސްކޮށްފައެވެ.
އެމްޑީޕީން ފާސްކުރި ގަރާރުގައި ބުނެފައިވާގޮތުން، ގާނޫނުއަސާސީއަށް ގެނެސްފައިވާ ބަދަލުގެ ސަބަބުން ރައްޔިތުންނަށް ލިބިދީފައިވާ ބާރުވެރިކަން ނިގުޅިގެންދެއެވެ.
އަދި ރައްޔިތުންގެ މަސްލަހަތާއި ހިލާފަށް ސިޔާސީ ޕާޓީން އަންގާ ގޮތަށް އަމަލުނުކުރުމުގެ ސަބަބުން މަޖިލީސް މެމްބަރުންގެ، މެމްބަރުކަން ގެއްލިގެންދާ ހާލަތެއް އުފަަންކޮށްފައިވަނީ ގާނޫނު އަސާސީއާވެސް ހިލާފަށްކަމަށް ބުނެފައުވެއެވެ.
ހަމަ އެހެންމެ، ގާނޫނުއަސާސީއަށް މިފަހުން ގެނެސްފައިވާ ބަދަލަކީ ރައްޔިތުންގެ ބާރުވެރިކަން ނިގުޅައިގަނެ ރައްޔިތުންގެ މަޖިލީހުގެ މެމްބަރުން ރައްޔިތުންގެ މަސްލަހަތުގައި މަސައްކަތްކުރަން އޮތް މިނިވަން އިހުތިޔާރުވެސް ނިގުޅައިގަންނަ ގާނޫނުއަސާސީގެ އަސާސީ އޮނިގަނޑާއިވެސް ހިލާފު އިސްލާހެއްކަމަށް އެ ގަރާރުގައިވެއެވެ.
މިއާއެކު ގަރާރުގައި ބުނީ، ރައްޔިތުންގެ ހައްގުގައި ވަކާލާތު ކުރުމުގެ ގޮތުން ބުނި ބަހެއްގެ ސަބަބުން ނުވަތަ ވޯޓު ދިނުމުގައި އަމަލު ކުރި ގޮތެއްގެ ސަބަބުން އެ މެންބަރަކު ނިސްބަތްވާ ސިޔާސީ ޕާޓީން ވަކިކޮށްފި ނަމަ، ނުވަތަ، ރައްޔިތުންގެ މަސްލަހަތުގައި އެމްޑީޕީން ކުރަމުންގެންދާ މަސައްކަތުގައި ބައިވެރިވުމުގެ ގޮތުން އެ މެންބަރަކު ނިސްބަތްވާ ޕާޓީއަކުން ވަކިވެ އެމްޑީޕީގެ މެންބަރަކަށް ވުމުގެ ސަބަބުން އެ މެންބަރަކު ރައްޔިތުންގެ މަޖިލީހުގެ މެންބަރުކަމުން ވަކިވެއްޖެ ނަމަ، އެ ހާލަތްތަކުގައި އެ މެންބަރަކަށް އެމްޑީޕީން އެހީތެރިވާނެ ކަމަށް ގަރާރުގައިވެއެވެ.
"އެ މެންބަރަކު ތަމްސީލު ކުރި ދާއިރާއިން ރައްޔިތުންގެ މަޖިލީހަށް އެ މެންބަރަކު އިންތިޚާބު ކުރުމަށް ބާއްވާ ބައި އިލެކްޝަންގައި ރައްޔިތުންގެ މަޖިލީހުން ވަކިކުރި މެންބަރު ވާދަކުރާނަމަ މި ޕާޓީން އެ މެންބަރަކަށް ތާއިދު ކުރުމަށާއި އެ މެންބަރަކު އަލުން ރައްޔިތުންގެ މަޖިލީހަށް އިންތިޚާބު ކުރުމަށް ދިވެހި ރައްޔިތުންގެ ޑިމޮކްރެޓިކް ޕާޓީގެ ފަރާތުން މަސައްކަތް ކޮށްދިނުމަށް އެއްބަސްވެ މަތީގައި ބުނެވުނު އެންމެހާ ކަންކަމެއް ކުރުމަށް ދިވެހި ރައްޔިތުންގެ ޑިމޮކްރެޓިކް ޕާޓީގެ ގައުމީ މަޖިލިސް އިގުރާރުވަމެވެ." އެ ގަރާރުގައިވެއެވެ.
Advertisement
This content is created and paid for by advertisers and does not involve Voice Journalists
