މިއަދު ހެނދުނު ހައުސިންގ މިނިސްޓްރީގައި އަލިފާން ރޯވެ އަނދަމުން ދިޔުމާ ގުޅިގެން އެ ސަރަހައްދުގައި ސްކޫލުތަކުގެ ދަރިވަރުން ގެއަށް ފޮނުވާލައިފިއެވެ.

އެގޮތުން ތާޖުއްދީން ސްކޫލާއި ހިރިޔާ ސްކޫލާއި ފަލާހް ޕްރީ ސްކޫލުގެ ކުދިން ގެއަށް ދޫކޮށްލާފައިވާ ކަމަށް މައުލޫމާތު ލިބެއެވެ.

އަލިފާނުގެ ސަބަބުން އަރަމުންދާ ދުމުން މުޅި ބޮޑު ތަކުރުފާނު މަގު އޮތީ ކަޅު ކޮށްލާފައެވެ. އެ ސަރަހައްދުގައި ފުލުހުންނާއި ސިފައިވެސް އަންނަނީ  ހަރަކާތްތެރިވަމުން ނެވެ.

އަލިފާންގަނޑު އެންމެ ފުރަތަމަ ރޯވީ، ހަައުސިން މިނިސްޓްރީގައި ހުރި ޓިނު އިމާރާތެއްގައި، އެ އަލިފާންގަނޑު ގޮސް ފެތުރުނީ ކޮންސްޓްރަކްޝަން މިނިސްޓްރީ ހުރި އިމާރާތަށް ފެތުރި، އެ ދެ އިމާރާތް އެއްކޮށް ވަނީ އަނދާފައެވެ. އަދި، އަލިފާންގަނޑު މިހާރު ވަނީ ގްރީން ބިލްޑިން އަށް ފޯރާފައެވެ.

ގްރީން ބިލްޑިންގައި ހިމެނެނީ އެންވަޔަރަމަންޓް މިނިސްޓްރީ އާއި އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)އެވެ. 

އަލިފާންގަނޑު ކޮންޓްރޯލް ކުރުމަށް އެއާޕޯޓު ފަޔަރ ފައިޓަރުންގެ އެހީ ހޯދައިފައިވާއިރު، ފުލުހުން އަންނަނީ ލިޔެކިޔުންތައް ރައްކާތެރި ކުރުމަށް މަސައްކަތް ކުރަމުންނެވެ. 

އެ ސަރަހައްދަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު އާއި މަޖިލީހުގެ ރައީސް އަބްދުއްރަހީމް ވަނީ ވަޑައިގެންފައެވެ.