ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ އަދި އެންވާރަމަންޓު މިނިސްޓްރީގެ އިތުރުން މާލެސިޓީ ކައުންސިލްގެ އޮފީސް ސެކްޝަންތަކެއް ހުންނަ އިމާރާތުގައި މިއަދު ހެނދުނު ހިނގި އަލިފާނުގެ ހާދިސާގައި އެ އިމާރާތް ވަނީ އެއްކޮށް އަނދައިގެން ގޮސްފައެވެ. އިމާރާތުގައި އަލިފާން ރޯވިގަޑިއަކީ މުއައްޒަފުން އޮފީހަށް އައުމަށް ތައްޔާރުވަމުންދިޔަ ގަޑިއެވެ.

އަލިފާނުގެ މި ހާދިސާގައި މާލެސިޓީ ކައުންސިލްގެ މުއައްޒަފުންތަކެއް އުމްރާއަށްދާންވެގެން އެއްކޮށްފައިހުރި ފައިސާކޮޅު ފަޔަރ އެންޑް ރެސްކިއު ޓީމުން ވަނީ ހޯދައި ވެރިފަރާތާ ހަވާލުކޮށްފައެވެ. ވައިޓަލް ސެކްޝަންގައި މަސައްކަތްކުރާ މުއައްޒަފުން އެ ފައިސާ ބަހައްޓާފައި ހުރީ އޮފީހުގެ ކަބަޑެއްގެ ތެރޭގައެވެ. އެއީ ގާތްގަނޑަކަށް 4،000 ޑޮލަރެވެ. މި ފައިސާ ހޯދާފައިވަނީ އެތަނުން މުއައްޒަފެއްގެ ފަރާތުން މައުލޫމާތު ލިބުމާއެކު، ސިޓީކައުންސިލްގެ މުއައްޒަފުންނާއި އެމްއެންޑިއެފްގެ ރެސްކިއުޓީމުން އޮފީސްތެރެއަށް ވަދެއެވެ. މިކަން މާލެސިޓީގެ ޑެޕިއުޓީ މޭޔަރު އަހުމަދު ނަރީޝް ވަނީ ބައެއް މީޑިއާތަކަށް ކަށަވަރުކޮށްދެއްވާފައެވެ.

މިއަދު ހެނދުނު ހިނގި އަލިފާނުގެ މި ހާދިސާގައި ސަރުކާރުގެ އިން ވުޒާރާއެއްގެ އިތުރުން މާލެސިޓީ ކައުންސިލްގެ 3 ސެކްޝަނެއް ހިންގަމުންދާ އޮފީސް ބަޔަށް ވަނީ ބޮޑެތި ގެއްލުންތަކެއް ލިބިފައެވެ. ތިމާވެއްޓާ ބެހޭ ވުޒާރާއިން ބުނެފައިވަނީ އޮފީސް އަނދައިގެން ދިޔައީ ހުރިހާ ތަކެއްޗާއެކު ކަމަށެވެ. 

Advertisement

މިހާދިސާގައި ތިން ވުޒާރާގެ އިތުރުން ސިޓީ ކައުންސިލްގެ ވައިޓަލް ސެކްޝަނާއި ބިލްޑިން ސެކްޝަނުގެ އިތުރުން ލޭންޑް ސެކްޝަނުގެ މަސައްކަތްތައް ވަނީ ވަގުތީގޮތުން ހުއްޓުމަކަށް އައިސްފައެވެ.