ރައީސް ސޯލިހާއި، ފައްޔާޒް އަދި ޝިޔާމްގެ މައްސަލަ ބެލުމަށް ރައްޔިތުންގެ މަޖިލީހުން ނިންމީ އެމްޑީޕީއަށް ބިރުދައްކަން ކަމަށް އެޕާޓީން ބުނެފިއެވެ.

އެމްޑީޕީ ޕާލިމަންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވީ، ކުރީގެ ރައީސް އިބްރާހިމް މުހައްމަދު ސޯލިހާއި، އެމަނިކުފާނުގެ ކެބިނެޓްގައި ހިމެނިވަޑައިގަންނަވާ ބައެއް ބޭފުޅުންގެ މައްސަލަތައް ބެލުމަށް ސަރުކާރުން ނިންމީ ސިޔާސީގޮތުން ބިރުދެއްކުމަށް ކަމަށެވެ. ގަޕޯ ވިދާޅުވީ ދިވެހި ޖުމްހޫރިއްޔާގެ ޢާނޫނުއަސާސީގެ 115 ވަނަ މާއްދާގައި އެންމެހާ ރައްޔިތުން ހައްގުތައް ހިމާޔަތްކުރުމަކީ ރައީސުލްޖުމްހޫރިއްޔާގެ މައްޗަށް ލާޒިމުކޮށްފައި އޮންނަ ކަމަކަށްވާއިރު، އެމްޑީޕީ ސަރުކާރުން ސެޓުލްމަންޓުތައް ހަދާފައިވާނީ އެ އޮންނަ އުސޫލުގެ މަތިންކަމަށެވެ. 

ސަރުކާރުގެ މެޖޯރިޓީ އޮންނަ ރައްޔިތުންގެ މަޖިލީހުން އެ މައްސަލަ ބެލުމަށް ފާސްކޮށް މައްސަލަ ޕީޖީ އޮފީހަށް ފޮނުވަނީ ބިރުދައްކަންކަމަށް ގަޕޯ ވިދާޅުވިއެވެ.

މި ސަރުކާރުން އެ މައްސަލަ ބަލަން އުޅެނީ ގޮތްހުސްވެގެންކަން ފާހަގަކުރައްވަމުން ގަޕޯ ވިދާޅުވީ، ސަރުކާރުގެ ކަންކަން ފެންނަމުންދަނީ ވަރަށް ގޯސްކޮށް ކަމަށާއި، ސަރުކާރާއި ސަރުކާރުގެ ކުންފުނިތަކުގައި ފެންނަމުންދަނީ އުސޫލުން ބޭރުން ކަންކަން ކުރަމުންދާކަމަށެވެ. މިގޮތުން ތެލާއި ކާޑުގެ ބާވަތްތައް ގެނައުމަށް މިހާރުވެސް ބޮޑު އިންޓްރަސްޓާއެކު 50 މިލިއަން ޑޮލަރުގެ ލޯނެއް ނަގުމަށް ނިންމާފައިވާކަމަށެވެ. ތިން އަހަރުތެރޭގައި އެ ލޯނު އަނބުރާ ދައްކާއިރު އިންޓްރަސްޓަށް އެކަނިވެސް 15 މިލިއަން ޑޮލަރު އަރާކަމަށް ގަޕޯ ވިދާޅުވިއެވެ.

މިއަދު ކަންކަން ކުރަމުންދަނީ އެންމެ މީހެއްގެ ވިސްނުމަށް ބުރަވެ ކަމަށާއި، ބޭރުފައިސާ ގަނެ ވިއްކުމުގެ ބިލް މަޖިލީހުން ފާސްކޮށްފައިވަނީވެސް ޓޫރިޒަމް ސިނާއަތަށް ބެލުމެއްނެތިކަމަށް ގަޕޯ ފާހަގަކުރެއްވިއެވެ.

ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ މަޖިލީހުގެ ތެރެއިން އިދިކޮޅު ޕާޓީގެ ހައިސިއްޔަތުން ސަރުކާރު ޒިއްމާދާރުކުރުމަށް ގިނަ މަސައްކަތްތަކެއް ކުރެވުނު ކަމަށެވެ. މިގޮތުން ނިމިގެންދިޔަ ސަރުކާރުގައި މާލޭގެ ރައްޔިތުންނަށް ދޫކުރި ބިމާއި ފްލެޓްތައް ދިނުން އަވަސްކުރުމަށް މަސައްކަތްކުރިނަމަވެސް ސަރުކާރުން އެ ފްލެޓްތަކާއި ބިންތައް ދޫކުރުން ދައްމާލާފައިވާކަން ނާޒިލް ފާހަގަކުރެއްވިއެވެ. އެންމެފަހުން އެކަމާ ގުޅޭ އިދާރާ މިއަދު އަނދައިގެން ދިޔައިރު، މިކަމާ ގުޅޭގޮތުން ދެން ސަރުކާރުން ބުނާނެ އެއްޗެއް ނޭނގޭކަމަށާއި، މިކަމަކީ ނުހަނު ކަންބޮޑުވާ ކަމެއްކަމަށް އޭނާ ވިދާޅުވިއެވެ.