ދައުލަތުގެ މީޑިއާ، ޕީއެސްއެމުން ގެނެސްދިން ލައިވް އިވެންޓެއްގައި ކީރިތި ގުރުއާނުގެ އާޔަތެއް ކިޔަވަމުންދަނިކޮށް އާޔަތުގެ އަޑުން ބައެއް އުނިވި މައްސަލާގައި ޕީއެސްއެމުން މައާފަށްއެދިއްޖެއެވެ.
ޕީއެސްއެމުން ގެނެސްދިން ލައިވް އިވެންޓެއްގައި ޓެކްނިކަލް މައްސަލައެއް ދިމާވެ، އެވަގުތު ކިޔަވަމުންދިޔަ އާޔަތުގެ އެއްބައި އުނިވި މައްސަލައާ ގުޅޭގޮތުން ޕީއެސްއެމްގެ މެނޭޖިންގ ޑިރެކްޓަރ މުޙައްމަދު ސަޢީދު ވިދާޅުވީ، އެކަން އެގޮތަށް ދިމާވި މައްސަލަ ވަރަށް ސީރިއަސް މައްސަލައެއްގެ ގޮތުގައި ކުންފުނިން ބަލަމުންދާކަމަށެވެ. އެކަން އެހެން އެވީ އެޑިޓްކުރި ކޮންޓެންޓަކުން ނޫންކަން ފާހަގަކުރަމުން އޭނާ ވިދާޅުވީ، އެފަދަ ގޮތަކަށް ކަންކަން ކުރުމަކީ އެ މީޑިއާއިން ކުރާނެ ކަމެއް ނޫންކަމަށާއި އެކަމުގެ ޔަގީންކަން ދޭ ކަމަށެވެ.
ސައީދު ވިދާޅުވީ ޤުރުއާނުގެ ބައެއް އުނިވި މައްސަލާގައި އެވަގުތު ކޮންޓްރޯލްގައި އެކަމުގެ ޒިއްމާނަގަންޖެހޭ މުއައްޒަފުންގެ މައްސަލަ ބަލައި މަސައްކަތުން އެކަހެރިކުރެވިފައިވާކަމަށެވެ. އަދި ގުރުއާނުގެ އާޔަތެއްގެ ބައި އުނިވި މައްސަލަ ބްރޯޑްކާސްޓިން ކޮމިޝަނަށް ހުށަހަޅައި އެމައްސަލަ ދިމާވީ އެޑިޓްކުރުމުގެ ސަބަބުންތޯ ބަލައިދިނުމަށް ކޮމިޝަނުގައި އެދިފައިވާނޭކަމަށްވެސް އޭނާ ވިދާޅުވިއެވެ.
ޕީއެސްއެމުން ބުނީ ލައިވްކޮށް ގެނެސްދިން އިވެންޓެއްގައި ދިމާވި އެ މައްސަލަ އަލުން ތަކުރާރު ނުވާނޭހެން ކަންކަން އިންތިޒާމް ކުރަމުންދާކަމަށެވެ.
Advertisement
This content is created and paid for by advertisers and does not involve Voice Journalists
