މިއަދު ހެނދުނު ހިނގާދިޔަ އަލިފާނުގެ ހާދިސާގައި 29 މީހަކު، ވަގުތީހިޔާތަކަށް ބަދަލުކުރުމުގެ މަސައްކަތް ދަނީ ކުރިއަށްދާކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ބުނެފިއެވެ.

ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ އަދި އެންވާރަމަންޓު މިނިސްޓްރީގެ އިތުރުން މާލެސިޓީ ކައުންސިލްގެ އޮފީސް ސެކްޝަންތަކެއް ހުންނަ އިމާރާތުގައި ހިނގި އަލިފާނުގެ ހާދިސާގައި އެހިސާބުގެ ބައެއް ގެތަކަށްވެސް ވަނީ އަލިފާނުގެ އަސަރުކޮށްފައެވެ.

މިކަމާ ގުޅޭގޮތުން ޑިޒާސްޓާ އޮފީހުން ބުނީ، މިހާތަނަށް 3 އިމާރާތެއްގެ 7 ގޭބީސީއަކުން 29 މީހުން ވަގުތީ ހިޔާތަކަށް ބަދަލުކުރުމުގެ މަސައްކަތް ކުރިއަށްދާކަމަށެވެ. އޭގެތެރޭގައި 15 ފިރިހެނުންނާއި 14 އަންހެނުން ހިމެނޭކަމަށް ޑިޒާސްޓާއިން ބުންޏެވެ. އެފަރާތްތަކުގެ ތެރޭގައި ސިއްޚީ ހާއްސަ އެހީތެރިކަން ބޭނުންވާ މީހަކުވެސް ހިމެނެެވެ. އަލިފާނު އަސަރުކޮށްގެން މީހުން ބަދަލުކުރަން ޖެހުނު ގޭތަކުގެ ތެރޭގައި ހިމެނެނީ، މ.ލޯކަށިގެ، މ.ކުދިމާވިލާގެ އިތުރުން މ.ލޫބިޔާއެވެ.

Advertisement

ޑިޒާސްޓާ އޮފީހުން ބުނީ އަލިފާނުގެ ހާދިސާއާއި ގުޅިގެން ފެނާއި ކަރަންޓު ކެނޑިފައިވާ އިމާރާތްތަކަށް ފެނާއި ކަރަންޓު އަލުން ގުޅައިދިނުމުގެ ޚިދުމަތް ސަރުކާރުގެ ކަމާ ބެހޭ އިދާރާތަކާއެކު ކުރަމުންގެންދާ ކަމަށެވެ. މިއަދު ހިނގި އަލިފާނުގެ ހާދިސާއާއި ގުޅިގެން 50 މީހަކު ވަނީ އެ އޮތޯރިޓީގެ އެހީތެރިކަމަށް އެދިފައެވެ.

މިއަދު ހިނގާދިޔަ އަލިފާނުގެ ހާދިސާގައި އެ އިމާރާތް ވަނީ އެއްކޮށް އަނދައިގެން ގޮސްފައެވެ. އިމާރާތުގައި އަލިފާން ރޯވިގަޑިއަކީ މުއައްޒަފުން އޮފީހަށް އައުމަށް ތައްޔާރުވަމުންދިޔަ ގަޑިއެވެ.