އިއްޔެ ހެނދުނުގެ ވަގުތެއްގައި، ގެދޮރުވެރިކަމާއި ބެހޭ ވުޒާރާ ހުން އިމާރާތުގައި ހިނގި އަލިފާނުގެ ހާދިސާއާއި، ވުޒާރާގެ ސާވާ ގެއްލުންވެފައިވާ ކަމަށާ އެ ސަލާމަތް ނުކުރެވުމުގެ ސަބަބުން އޭގައި ހުރި ހުރިހާ ޑޭޓާ އެއްކޮށް ގެއްލިފައިވާ ކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާގެ ވަޒީރު ޑރ. އަލީ ހައިދަރު އަހުމަދު މިއަދު ވިދާޅުވެއްޖެ އެވެ.
ދައުލަތުގެ މީޑިޔާ ޕީއެސްއެމަށް ދެއްވި ބަސްދީގަތުމެއްގައި ވަޒީރު ޑރ. ހައިދަރު ވިދާޅުވީ އަލިފާނުގެ ހާދިސާއާ ގުޅިގެން އެ ވުޒާރާގެ ހުރިހާ ލިޔެކިޔުންތަކަކާއި ޑާޓާއެއްހެން ގެއްލިގެން ގޮސްފައިވާ ކަމަށެވެ.
ހާއްސަކޮށް އަޅުގަނޑުމެންގެ ސާވާ ސަލާމަތް ނުކުރެވޭނެ ކަމަށް މިހާރު އަންދާޒާ ކުރެވެނީ. އެހެން ކަމަށް ވެއްޖެއްޔާ އެއީ ވަރަށް ބޮޑު ގެއްލުމެއް. އެއޫ އަޅުގަނޑުމެން އަތުގައި ހުރި ހުރިހާ މައުލޫމާތެއް ގެއްލިގެން އެ ދިޔައީ. ހުރިހާ މުވައްޒަފުންގެ މައުލޫމާތާއި، އަދި އަޅުގަނޑުމެން ކުރަމުން ގެންދިޔަ ހުރިހާ މަޝްރޫޢު ތަކެއްގެ މައުލޫމާތުވެސް ހަމަ ރައްކާކުރެވިފައި ހުންނާނީ ސާވާގައި. އެ ސާވާއަށް އެކްސެސް ނުލިބޭ ކަމަށް ވަންޏާ އެ މައުލޫމާތު އަލުން ހޯދޭނެ ގޮތެއް ނޯންނާނެ. ދެން ހުރިހާ ލިޔެ ކިޔުމެއްވެސް އަނދައި އެ ދިޔައީ
ވަޒީރު ޑރ.ހައިދަރު
މިނިސްޓަރު ހައިދަރު އިތުރަށް ވިދާޅުވީ ސަރވާ ރިކަވަރ ނުކުރެވުނު ނަމަވެސް ފްލެޓް ލިސްޓަށް އަސަރު ނުކުރާނެ ކަމަށެވެ.
ނަސީބަކުން އަޅުގަނޑުމެން ފްލެޓް ލިސްޓުގެ ހުރިހާ މައުލޫމާތަކާއި ގެދޮރުވެރިކަމުގެ މަޝްރޫއާއި ބިންވެރިކަމުގެ ހުރިހާ މަޝްރޫއެއްގެ މައުލޫމާތެއް ރައްކާކުރަމުންދިޔައީ ކްލައުޑުގައި. އެހެންވީމަ ސާވާއަށް ގެއްލުން ލިބުނަސް އަޅުގަނޑުމެންނަށް އެ މައުލޫމާތު ލިބެން ހުންނާނެ ކްލައުޑުން.
ވަޒީރު ޑރ ހައިދަރު
ވަޒީރު ހައިދަރު އިތުރަށް ވިދާޅުވީ، ގެދޮރުވެރިކަމާބެހޭ ވުޒާރާގެ މަސައްކަތްތައް ދަރުބާރުގެއަށް ވަގުތީގޮތުން ބަދަލުކުރުމުގެ މަސައްކަތް މިހާރު ކުރަމުންދާ ކަމަށެވެ. އެކަމުގައި ދައުލަތުގެ އެކި މުއައްސަސާތަކާއި ސަރުކާރުގެ ކުންފުނިތަކުގެ އެހީތެރިކަން ލިބެމުންދާކަމަށާ އެ މަސައްކަތް މިރޭ 10:00އަށް ނިންމާލެވޭނެ ކަމަށެވެ.
އަދި އަންނަ އާދީއްތަ ދުވަހު ވުޒާރާގެ މަސައްކަތް ދަރުބާރުގޭގައި ފެށޭނެކަމަށްވެސް ވަޒީރު ވިދާޅުވިއެވެ.
އިއްޔެ ހިނގި އަލިފާނުގެ ހާދިސާގައި ގެދޮރުވެރިކަމާބެހޭ ވުޒާރާގެ އިތުރުން އިމާރާތް ކުރުމާއި ބިނާރާބެހޭ ވުޒާރާ އަދި ތިމާވެއްޓާބެހޭ ވުޒާރާއަށްވެސް ވަނީ ބޮޑެތި ގެއްލުންތަކެއް ލިބިފައެވެ. އެ ދެ ވުޒާރާގެ މަސައްކަތްވެސް ވަނީ ދަރުބާރުގެއަށް ބަދަލުކޮށްފައެވެ.
Advertisement
This content is created and paid for by advertisers and does not involve Voice Journalists
