ރާއްޖެއިން ޗައިނާއަށް ކަނޑައެޅުއްވި އައު ސަފީރު، ޑރ.ފަޒީލް ނަޖީބް، އެމަނިކުފާނުގެ ސަފީރުކަމުގެ ފަތްކޮޅު ޗައިނާގެ ރައީސް ޝީ ޖިންޕިންގ އަށް އަރުވައިފިއެވެ.

ސަފީރުކަމުގެ ފަތްކޮޅު އެރުވުން އޮތީ، ބެއިޖިންގ ގައި ހުންނަ ގްރޭޓް ހޯލް އޮފް ދަ ޕީޕަލްގައި އެކަމަށްޓަކައި ބޭއްވި ހާއްސަ ރަސްމިއްޔާތެއްގައެވެ. މި ރަސްމިއްޔާތުގައި ސަފީރު ފަޒީލް ނަޖީބުވަނީ ރައީސް ޑރ.މުހައްމަދު މުއިއްޒުއާއި، ދިވެހި ރައްޔިތުންގެ ފަރާތުން ޗައިނާގެ ރައީސް ޝީ އަށާއި އެޤައުމުގެ ރައްޔިތުންނަށް މެހެޔޮ އެދުންތަކާއި ސަލާން އަރުވާފައެވެ.

މި ރަސްމިއްޔާތުގައި ޗައިނާގެ ރައީސް ވަނީ، ރާއްޖެއާއެކު އޮންނަ ގުޅުން ވަރުގަދަކުރުމަށް ޗައިނާ ގެ ފަރާތުން ސަފީރު ފަޒީލް ނަޖީބަށް ފުރިހަމަ އެއްބާރުލުން ދެއްވާނޭކަމަށް ވިދާޅުވެފައެވެ. ފަޒީލް ނަޒީބަކީ ރާއްޖެއިން ޗައިނާއަށް ކަނދައެޅުއްވި 5 ވަނަ ސަފީރެވެ. 

Advertisement

ޗައިނާ އާއި ދިވެހިރާއްޖެއާ ދެމެދު ސިޔާސީ ގުޅުން ގާއިމްކުރެވުނީ މީގެ 52 އަހަރުކުރިން 1972 ވަނަ އަހަރެވެ. ޗައިނާއަކީ ރާއްޖޭގެ އިގްތިސާދީ އަދި އުމްރާނީ ތަރައްޤީގައި ވަރަށް ފުރިހަމަ ގޮތެއްގައި އެއްބާރުލުން ދެމުން އަންނަ ޤައުމެއްކަމަށް ސަރުކާރުން ފާހަގަކުރެއެވެ.