ވޭސްޓް މެނޭޖްމެންޓް ކޯޕަރޭޝަން (ވެމްކޯ)ގެ ވިޔަފާރި ސިންދަފާތުކުރުމަށް ކުރަމުންގެންދާ މަސައްކަތްތަކުގެ ދަށުން އިމާރާތްތައް ތަޅައިދިނުމުގެ މަސައްކަތް ފެށުމަށް ތައްޔާރުވެއްޖެއެވެ.

ވެމްކޯއިން އިމާރާތް ތަޅައިދިނުމުގެ މަސައްކަތް ފަށަން އުޅޭކަން އެކުންފުނީގެ ސީނިއާ ބޭފުޅަކު ވަނީ ވޮއިސްއަށް ކަށަވަރުކޮށްދެއްވާފައެވެ. މި ވިޔަފާރީގެ ތެރެއަށް ވަނުމަށް ނިންމީ، ވެމްކޯގެ ވިޔަފާރި ޑައިވަރސިފައި ކުރުމަށް އެކުންފުނިން ކުރަމުންގެންދާ މަސައްކަތްތަކުގެ ދަށުންކަމަށް އޭނާ ވިދާޅުވިއެވެ. ވެމްކޯއިން މިހާރު ދަނީ އެ މަސައްކަތް ފެށުމަށްޓަކައި ކުރަންޖެހޭ މަސައްކަތްތައް ކުރަމުންނެވެ. މިގޮތުން އެކަން ކުރާނޭ އަގުތައް ކަނދައެޅުމާއި މަސައްކަތް ކުރިއަށްގެންދާނޭ ގޮތުގެ ޕްލޭންތައް މިހާރު ދަނީ ކުރިއަށެވެ.

ވެމްކޯއިން މިހާރުވެސް ތަޅާލާފައި ހުންނަ އިމާރާތްތަކުގެ ގައުކުނޑިތައް އުކާލުމުގެ ހިދުމަތްދެއެވެ. އެންމެ ފުރަތަމަ ވެމްކޯގެ ހިދުމަތް ފެށިއިރު އެކުންފުނިން ކުރަމުންގެންދިޔައީ ގޭބިސީތަކާއި، އެނޫންވެސް ތަންތަނުގައި އުފެދޭ ކުނިތައް އުކާލައި އެ ނައްތާލުމުގެ މަސައްކަތެވެ.

Advertisement

ވެމްކޯ ވުޖޫދަށް އައީ 2009 ވަނަ އަހަރެވެ. އެކުންފުނިން އެންމެ ފުރަތަމަ މާލެ ސަރަހައްދުގައި ކުނި އުކުމުގެ ހިދުމަތް ދޭން ފަށާފައިވަނީ 2016 ވަނަ އަހަރެވެ. ވެމްކޯއިން މިހާރު ދަނީ މާލެ ސަރަހައްދުގެ އިތުރުން، މާލެ އަތޮޅާއި އެނޫންވެސް ބައެއް ރަށްތަކުގައިވެސް ކުނި އުކާލުމުގެ ހިދުމަތް ދެމުންނެވެ. މީގެ އިތުރުން ވެމްކޯއިން ގެންދަނީ ރިސޯޓްތަކުގައި އުފެދޭ ކުނި މެނޭޖްކުރަމުންނެވެ.