އަލިފާނުގެ ހާދިސާގައި ހައުސިން އަދި ކޮންސްޓްރަކްޝަން ވުޒާރާ ހުންނަ އޮފީސް އިމާރާތް އަނދައިގެން ދިޔަނަމަވެސް، ވުޒާރާތަކުގެ މުހިއްމު މައުލޫމާތުތައް އިއާދަކުރެވޭނޭކަމަށް އިންފްރާސްޓްރަކްޗަރު މިނިސްޓަރު، ޑރ. އަބްދުﷲ މުއްތަލިބު ވިދާޅުވެއްޖެއެވެ.

މިދިޔަ ބުރާސްފަތިދުވަހު ހިނގި އަލިފާނުގެ ހާދިސާ އާ ގުޅިގެން ހައުސިން މިނިސްޓްރީ ހިންގަމުންދިޔަ އިމާރާތުގައި ހިންގަމުންދިޔަ ކޮންސްޓްރަކްޝަން މިނިސްޓްރީ އާއި ތިމާވެއްޓާބެހޭ މިނިސްޓްރީގެ ހިދުމަތްތައް ވަނީ، ދަރުބާރުގެއަށް ބަދަލުކުރުމުގެ މަސައްކަތް ފަށާފައެވެ.

ދަރުބާރުގެއަށް ބަދަލުކުރި ވުޒާރާތަކުން ހިދުމަތް ދިނުމަށް ވަމުންދާ ތައްޔާރީތަކާ ބެހޭގޮތުން މީޑިއާތަކާ ވާހަކަދައްކަވަމުން ޑރ. އަބްދުﷲ މުއްތަލިބު ވިދާޅުވީ، އަލިފާނުގެ ހާދިސާގައި އިމާރާތް އަނދައިގެން ދިޔަނަމަވެސް، މިހާތަނަށް ބެލި ބެލުމުން ދައުލަތުގެ އިދާރާތަކުގެ މުހިއްމު ގިނަ ޑޭޓާތައް ބެކަޕް ނެގިފައި އެބަހުރިކަމަށެވެ. 

Advertisement

މުއްތަލިބް ވިދާޅުވީ މިނިސްޓްރީން ގެއްލިގެންދިޔަ ޑޭޓާތައް ބަލަމުންދާކަމަށާއި، ހައުސިންނާއި ރައްޔިތުންނާ ގުޅުންހުރި ޑޭޓާތަކުގެ ބެކަޕް ހުރިކަމުގެ ޔަގީންކަން ރައްޔިތުންނަށް އަރުވާކަމަށެވެ. މިނިސްޓަރު ވިދާޅުވީ މިއުޅެނީ ދައުލަތުގެ ވަރަށް ބައިވަރު ޑޭޓާތައް ގެއްލިގެން ނޫންކަމަށާއި ސަރުކާރުން ރައްޔިތުންނަށް ދޭންޖެހޭ އަދި ކޮށްދޭންޖެހޭ އެއްވެސް ކަމަކަށް ބުރޫ ނާރާނޭކަމުގެ ޔަގީންކަން އެބައޮތް ކަމަށެވެ.

މިނިސްޓަރު މުައްތަލިބް ވިދާޅުވީ އަލިފާނުގެ ހާދިސާގައި އަނދައިގެންދިޔަ ތިން ވުޒާރާގެ ހިދުމަތްތައް މާދަމައިން ފެށިގެން އާއްމު ހާލަތުގައި ދެމުންގެންދާނޭކަމަށެވެ. މިގޮތުން މުއައްޒަފުންނަށް ފާހާނާ ކުރުމާއި ކެފެޓީރިއާގެ ކަންކަން ހަމަޖެއްސުމުގެ މަސައްކަތް ކުރިއަށްދާކަން މިނިސްޓަރު ފާހަގަކުރެއްވިއެވެ.