ރާއްޖޭގެ ރަށްތަކުގެ ތެރެއިން، ރަސްމީކޮށް އެރަށްތަކަށް ނުދެވި ހުރި ހުރިހާ ރަށަކަށް އަންނަ އަހަރު ނިމުމުގެ ކުރީން ވަޑައިގަންނަވާނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.
މަހިބަދޫ ރައްޔިތުންނާއެކު މިއަދު ބޭއްވި ބައްދަލުވުމުގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، އެމަނިކުފާނު ރާއްޖޭގެ ރަށްތަކަށް ކުރައްވަމުންދާ ދަތުރުފުޅުތަކުގެ ތެރެއިން، ރަށް ރަށަށް ވަޑައިގެން ހުރިހާ ކައުންސިލް ތަކާއި ބައްދަލު ކުރެއްވުމުގެ މަސައްކަތް ކުރައްވަމުންދާ ކަމަށެވެ.
އެގޮތުން، މިހާރު ބައްދަލު ނުކުރެވޭ އޮތީ ހަތަރު ކައުންސިލެއް ކަމަށާ، އެކައުންސިލްތަކާ، ބައްދަލު ކުރެއްވުމުން ރާއްޖޭގެ ހުރިހާ ކައުންސިލަކާއި ބައްދަލު ވާނެކަން ފާހަގަކުރެއްވިއެވެ.
މިހާރު ވަޑައިނުގެންނެވި ހުރި ހުރިހާ ރަށަކަށް ދިޔުމަށް ނިންމަވާފައިވާ ކަމަށް ރައީސް ވިދާޅުވިއެވެ.
ދެން އަޅުގަނޑު ނިންމާފައި އޮތީ، އަޅުގަނޑު ނުދާ ހުރިހާ ރަށަކަށް ދިޔުމުގެ ދަތުރުތައް. އެހެންވީމާ، އެވދަތުރުތައްވެސް ފަށާނަން. މި ދާއިރާގެ ދެންހުރި ރަށްތަކަށް ވެސް، މި އަތޮޅުގައިވެސް އަޅުގަނޑަށް ނުދެވި ހުރި ރަށްތަކަށްވެސް، ރަސްމީކޮށް ނުދެވި ހުރި ރަށްތަކަށް، އަދި މުޅި ރާއްހޭގައިވެސް ނުދެވޭ ރަށްތަކަށް، އަންނަ އަހަރު، އަންނަ އަހަރަށް ބަހާލައިގެން، އިރާދަކުރެއްވިއއޔާ އަންނަ އަހަރު ނިމުމުގެ ކުރިން، ރާއްޖޭގެ ކޮންމެ ރަށަކަށް އިރާދަކުރެއްވިއްޔާ އަޅުގަނޑު ދާނަން. ގޮއްސަ ކޮންމެ ރަށެއްގެ ރައްޔިތުންނާ އިރާދަކުރެއްވިއްޔާ އަޅުގަނޑު ބައްދަލު ކުރާނަން.
ރައީސް ޑރ މުޙައްމަދު މުޢިއްޒު
އޭރުން ރައްޔިތުންނާ ބައްދަލުވެ ރައްޔިތުން ބޭނުންވާ ގޮތަށް ކަންކަން ކުރެވިގެންދާނެ ކަމަށް ރައީސް ވިދާޅުވިއެވެ. އަދި ރއްޖޭގެ ކައުންސިލް ތަކުންވެސް ފުރިހަމަ އެއްބާރުލުން މި ސަރުކާރަށް ލިބެމުންދާ ކަން ފާހަގަކުރައްވައި ރައީސް ވިދާޅުވީ، އެހެން ނަމަވެސް ރައްޔިތުންގެ ޚިޔާލުވެސް ބޭނުންފުޅުވާ ކަމަށެވެ.
އަދި މިހާރު ނުދެވި ހުރި ރަށްތަކަކީ ދޫކޮށްލާ ރަށްތަކެއް ނޫން ކަމަށާ، ހުރިހާ ރަށަކަށްވެސް އެމަނިކުފާނު ވަޑައިގަންނަވާނެ ކަމުގެ ޔަގީންކަން ތަކުރާރުކޮށް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
