މާލޭގެ އެކި ކެފޭތަކަށް ވަދެ ގުރޫޕް މާރާމާރީތަކެއް ހިންގި މައްސަލަތަކެއް ފުލުހުން ތަހުގީގު ކުރަން ފަށައިފި އެވެ.

ޖުމްލަ ހަތަރު މާރާމާރީއެއްގެ މައްސަލަ ފުލުހުން ބަލަމުންދާއިރު، އެތަނުން ތިން މާރާމާރީ ހިންގާފައިވަނީ ރޭގެ ވަގުތެއްގައެވެ. 

އެގޮތުން ފުލުހުން ބުނީ، އެއިން އެއް މައްސަލަ އަކީ މިމަހުގެ 12 ވަނަ ދުވަހު ލެޓްސްގޯ ކެފޭއަށް ބަޔަކު ވަދެ ގެއްލުން ދިން މައްސަލަ އެވެ.

Advertisement

އަދި ރޭ ހިނގައިދިޔަ މާރާމާރީ ތަކުގެ ތެރެއިން ފުލުހުން ތަހުގީގު ކުރަމުންދާ އެއް މައްސަލަ އަކީ، ހެލްމެޓް އަޅައިގެން ސައިކަލުތަކެއްގައި ދިޔަ ބަޔަކު މާފަންނު ސަހަރާ ކައިރީގައި ހުންނަ ދިރިޕަބްލިކް ކެފޭ ތެރެއަށް ރޭގެ ވަގުތެއްގައި ވަދެ ހަމަނުޖެހުން ހިންގާ ތަކެއްްޗަށް ގެއްލުން ދިން މައްސަލަ އެވެ. 

ރޭގެ ދެވަނަ މައްސަލައަކީ ސައިކަލެއްގައި ދިޔަ ހަ މީހަކު، ކިންޒާ ކެފޭ ކުރިމަތީ ތޫނުހަތިޔާރު ބޭނުންކޮށްގެން މާރާމާރީ ހިންގި މައްސަލަ އެކެވެ.

އަދި ތިންވަނަ މައްސަލަ އަކީ، ފިލިގަސްމަގުގައި ހުންނަ ނޫރު މިސްކިތް ކައިރީގައި ބަޔަކު ރޭގެ ވަގުތެއްގައި މާރާމާރީ ހިންގި މައްސަލައެވެ.

ފުލުހުން ބުނީ މި މައްސަލަތައް ތަހުގީގު ކުރަމުންދާ ކަމަށާ އިތުރު ތަފްސީލް ހުއްސާ ކުރާނެ ކަމަށެވެ.

ނަމަވެސް މި މައްސަލަތަކުގައި ތުހުމަތު ކުރެވޭ ބަޔަކު ހައްޔަރުކުރި ކަމަކަށް އަދި ނުބުނެ އެވެ.