މިިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ އަނދައި ހުލިވި މައްސަލާގައި ބޮޑެތި ތުހުމަތުތަކެއް ކޮށް، އެ މައްސަލަ ތަހުގީގު ކުރުމަށް ފުލުހުންނާއި ނެޝަނަލް އިންޓެގްރިޓީ ކޮމިޝަން (އެންއައިސީ) އަށް ހުށަހަޅަން އެމްޑީޕީ އިން ނިންމައިފި އެވެ.
އެމްޑީޕީން މިއަދު ހެނދުނު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، އެ ޕާޓީގެ ލީގަލް ޑިރެކްޓަރު މަހުފޫޒު ސައީދު ވިދާޅުވީ އެއީ ބަޔަކު ގަސްތުގައި ރާވައިގެން ކުރި ކަމެއް ގޮތަށް ބެލެވޭ ކަމަށެވެ.
އެހެން ކަމުން، އެކަމާއި ގުޅިގެން ޖިނާއީ ތަހުގީގެއް ހިންގައިދިނުމަށް އެދި ފުލުހަށް ހުށަހަޅުއްވާނެ ކަމަށެވެ.
"ހާދިސާގެ މިނިވަން ތަހުގީގެއް ހިންގުމަކީ މުހިންމު ކަމެއް. އެކަމަށް އެދި އަޅުގަނޑުމެން ފުލުހުންނަށް ރިކުއެސްޓް އެބަކުރަން ޖިނާއީ މައްސަލައެއްގެ ގޮތުގައި ތަހުގީގު ކުރުމަށް. ހާދިސާ ހިނގާފައިވަނީ ކިހިނެއްތޯ ހޯދުމާއި އެކީގައި. އޭގައި ސިފައިން ބައިވެރި ކުރުންވެސް އެއީ އެދޭކަމެއް. އެކަމަށް މިއަދު އެދޭނަން.
އެމްޑީޕީގެ ލީގަލް ޑިރެކްޓަރު މަހުފޫޒު ސައީދު
މިއާއެކު، އަލިފާނުގެ ހާދިސާގައި އިހުމާލުގެ ގިނަ ކަންކަން ފާހަގަވާތީ ވަކި މައްސަލައެއް ނެޝަނަލް އިންޓެގްރިޓީ ކޮމިޝަން (އެންއައިސީ) އަށް ހުށަހަޅާނެ ކަމަށް އޭނާ ވިދާޅުވި އެވެ.
އެމްޑީޕީގެ ލީގަލް ޑިރެކްޓަރު މަހުފޫޒު ސައީދު: ފޮޓޯ/ އެމްޑީޕީ
މިއާއެކު މަހުފޫޒު ވަނީ، ހާދިސާ ހިނގި ސަރަހައްދު ސާފުކޮށް ނިންމުމަށްފަހު އެ މައްސަލަ ތަހުގީގު ކުރުމަށް ބޭރުގެ ޓީމެއް ގެންނާތީ އެކަމާވެސް ކަންބޮޑުވުން ފާޅުކުރައްވާފައެވެ.
ފުލުހުންގެ ފަރާތުން ވިދާޅުވެފައި އެބައޮތް, އަދި މިނިސްޓްރީންވެސް އިއުލާން ކިރެއްވި، ބޭރުގެ އެކްސްޕާޓުން ގެނެސްގެން ތަހުގީގު ކުރާ ވާހަކަ. ތިބޭފުޅުން ހަނދުމަ ހުންނާނެ ފިނިފެންމާ ލޯންޗުގެ ހާދިސާ. ބޭރުގެ ތިން ގައުމަކުން އައިސް ތަހުގީގުކުރި. އެކަމަކު އެއިން އައި ނަތީޖާއެއް ނެތް. ހާދިސާގެ ސަބަބު ހޯދިފައެއް ނެތް. ނުހޯދުނު ސަބަބަކީ އެ ބޭފުޅުންގެ އެހީ ހޯދީ، އަޅުގަނޑުމެން ހަދާނެ އެއްޗެއް ހަދާފައި. މި މައްސަލާގައިވެސް ކަންހިނގީ އެނގޮތަށް. އަލިފާނުގެ ހާދިސާ ހިނގި މުޅި ތަން ވެސް ސާފު ކުރުމަށް ފަހު ބޭރުގެ ތަޖުރިބާކާރުން ގެންނަނީ
އެމްޑީޕީގެ ލީގަލް ޑިރެކްޓަރު މަހުފޫޒު ސައީދު
މީގެ އިތުރުން މަހުފޫޒު ވިދާޅުވީ، އަރުޝީފުގެ ގާނޫނުގެ ދަށުން، ސަރުކާރުގެ އިދާރާތަކުގެ ލިޔެކިޔުންތަކަކީ ދިވެހި އަރުޝީފުގައި ރައްކާކުރަންޖެހޭ ލިޔެކިޔުންތަކެއް ކަމަށެވެ. ނަމަވެސް މިނިސްޓަރުން ފާހަގަ ކުރެއްވީ މިނިސްޓްރީން މިހާރު ފައްޓަވާފައި ހުރި މަޝްރޫއުތަކާ ގުޅޭ ހުރިހާ ލިޔެކިޔުންތަކެއް ގެއްލިގެން ގޮސްފައިވާކަން ކަން އޭނާ ފާހަގަކުރެއްވިއެވެ.
އެ ލިޔުންތަކަކީ އެއީ މި މާއްދާ ބަޔާންކުރާ ގޮތުން އަރުޝީފު ކުރެވެން ޖެހޭ އެއްޗެއް. އެހެންވީމަ އަރުޝީފު ކުރެވެން ޖެހޭ އެއްޗެއް އަރުޝީފު ނުކޮށް ހުރީތޯ ނޫނީ، އަރުޝީފު ކުރެވިފައި ހުއްޓާ އޭގެ ނަކަލުތައް ނެތިގެން ދިޔައީތޯ މިކަންކަން ބަލައި ތަހުގީގު ކުރުމަށް އަޅުގަނޑުމެން އަރުޝީފުގެ ޑިރެކްޓަރުގެ އަރިހުން އެދޭނަން،"
އެމްޑީޕީގެ ލީގަލް ޑިރެކްޓަރު މަހުފޫޒު ސައީދު
ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ސަލީމް (ސައްލެ): ފޮޓޯ/ އެމްޑީޕީ
މި ބައްދަލުވުމުގައި ވާހަކަދައްކަވަމުން ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ސަލީމް (ސައްލެ) ވަނީ، އެމްއެންޑީއެފްގެ ފަޔާ ސްޓޭޝަނާއި ހައުސިން އާއި ކޮންސްޓްރަކްޝަން މިނިސްޓްރީ އާ އެދެމެދު މާ ބޮޑު ދުރުމިނެއް ނެތް ނަމަވެސް އަލިފާން ކޮންޓްރޯލް ކުރަން ގިނަ ވަގުތު ނެގިކަން ފާހަގަކުރައްވައި އެހެން އެކަން ވާންވީ ސަބަބާމެދު ސުވާލު އުފައްދަވާފައެވެ.
އަދި އަލިފާނުގެ ހާދިސާ ހިނގުމުގެ ދުވަސްތަކެއް ކުރިން ސްޓެލްކޯއިން އެމްއެންޑީއެފަށް ހަދިޔާކުރި އަލިފާން ނިއްވަން ގެންގުޅޭ ޑްރާންތައް ވެސް އަލިފާން ނިއްވުމުގައި ބޭނުން ނުކުރީ ކީއްވެގެންތޯ ވެސް ސަލީމް ސުވާލު ކުރެއްވި އެވެ.
Advertisement
This content is created and paid for by advertisers and does not involve Voice Journalists
