އިސްރާއީލުން ސޫރިއާގެ ގޯލާންގެ އުސްބިންތައް ހިފައިގެން އެތަނުގައި ވަޒަންވެރިވުމަށް ކުރަމުންގެންދާ މަސައްކަތްތައް ބަލައި ނުގަނެވޭނޭކަމަށް ދިވެހި ހާރިޖިއްޔާއިން ބުނެފިއެވެ.

އިސްރާއީލުން ގޯލާނުގެ އުސް ބިންތަކުގައި ޔަހޫދީ އާބާދީތައް ހެދުމަށް ކުރަމުންގެންދާ މަސައްކަތްތަކާ ގުޅިގެން ދިވެހި ހާރިޖިއްޔާއިން އެކަން ކުއްވެރިކޮށް ނެރުނު ބަޔާނުގައި ބުނެފައިވަނީ، ޔަހޫދީ ދައުލަތުން ގޯލާނުގެ އުސް ބިންތަކުގައި ޔަހޫދީން އާބާދުކުރުމުގެ ގޮތުން އެތަނުގައި ޔަހޫދީން ވަޒަންވެރިކުރުމަށް ފަށާފައިވާ މަސައްކަތްތަކަކީ ދިވެހި ސަރުކާރުން ތާއީދު ކުރާނޭ ކަމެއް ނޫންކަމަށެވެ.

ހާރިޖިއްޔާގެ ބަޔާނުގައި ވަނީ އެކަން ވަރަށްބޮޑަށް ކުށްވެރިކޮށްއެއީ ބައިނަލްއަޤްވާމީ ޤާނޫނުތަކާ މުޅިން ހިލާފުކަމެއްކަން ފާހަގަކޮށްފައެވެ. އަދި އިސްރާއީލުގެ ދައުލަތުން ހިންގަމުންދާ ކަންކަމުން އެ ސަރަހައްދުގައި ސުލްހަ ގާއިމްކުރުމަށް ހުރަސްއެޅިފައިވާކަން ދިވެހި ހާރިޖިއްޔާގެ ބަޔާނުގައި ވަނީ ފާހަގަކޮށްފައެވެ.

ހާރިޖިއްޔާއިން ބުނީ ސޫރިއާގައި އިޒްރާއީލުން ކުރިއަށްގެންދާ ޖަރީމާތައް ހުއްޓާލަންޖެހޭ ކަމަށާއި، ދެމުންގެންދާ ހަމަލާތަށް މިހާރުން މިހާރަށް ހުއްޓާލުމަށް ގޮވާލާފައެވެ. މީގެ އިތުރުން ހާރިޖިއްޔާއިން ވަނީ މިކަމުގައި ބައިނަލްއަޤްވާމީ ފަރާތްތަކުން އެކަންކަން ހުއްޓުވުމަށްވެސް ބާރުއެޅުމަށްވެސް ގޮވާލާފައެވެ.

ހާރިޖިއްޔާއިން ބުނީ ސޫރިއާގެ މިނިވަންކަމާއި ސިޔާދަތާއި އިސްތިގުލާލު ރައްކާތެރިކުރުމަށް ކުރެވޭ މަސައްކަތްތަކުގައި ދިވެހިރާއްޖޭގެ ފުރިހަމަ ތާއީދު އަބަދުވެސް އޮންނާނޭ ކަމަށެވެ.

ގޯލާން ހައިޓްސް ނުވަތަ ގޯލާނުގެ އުސްބިންތަކަކީ މީގެ ބައިގަރުނުކުރިން އިސްރާއީލުން ހިފާފައިވާ ސަރަހައްދެކެވެ. އިސްރާއީލުން އެ ބިންތަކުގައި ޔަހޫދީ އާބާދީތައް ހެދުމަށް މީގެ ކުރިން އެތައް ފަހަރަކު މަސައްކަތްކުރަމުން އައިސްފައިވާއިރު، އިސްރާއީލުން އަންނަނީ ގޯލާންގައި ޔަހޫދީން އާބާދުކުރުމަށް ކޮންމެ އަހަރަކުވެސް އެތައް މިލިއަން ޑޮލަރެއް ހޭދަކުރަމުންނެވެ. އިސްރާއީލް ސަރުކާރުން ގަބޫލުކުރާގޮތުގައި ގޯލާންގެ އެ ރީތި ބިންތައް ހަނގުރާމައިން ސަލާމަތް ވެވިފައިނުވާ ސޫރިއާގެ ދަށުގައި އޮތުމަށްވުރެ އެމީހުންގެ އަތުގައި އޮތުން މާ އައުލާކަން ބޮޑެވެ. ގޯލާނުގެ މައްސަލާގައި އެމެރިކާއިން މީގެ ކުރިން ބުނެފައިވަނީ ގޯލާން ސަރަހައްދު އިސްރާއީލް ސަރުކާރުގެ ދަށުގައި އޮތުމަކީ އެމެރިކާއިންވެސް އެންމެ ރުހޭގޮތް ކަމަށެވެ.