އާޓިފިޝަލް ބީޗްގައި މާރާމާރީ ހިންގަން އިސްކޮށް އުޅުނު ބިދޭސީ މީހާ ޑީޕޯޓްކުރުމަށް ނިންމާފައިވާކަމަށް އިމިގްރޭޝަނުން ބުނެފިއެވެ.

ޑިސެމްބަރުމަހުގެ ހަވަނަ ދުވަހުގެ ހަވީރު، އިރުއޮއްސުނު ވަގުތު އާޓިފިޝަލް ބީޗުގައި ބިދޭސީންގެ ދެ ގުރޫޕެއް ދެމެދުގައި މާރާމާރީއެއް ހިނގައި ކުޑަކުއްޖަކަށް ވަނީ އަނިޔާ ލިބިފައެވެ.

މި މާރާމާރީއާ ގުޅޭގޮތުން އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ބުނީ، އެދުވަހު އާންމު މަސްލަހަތަށް ނުރައްކާވާ ގޮތަށް، އާޓިފިޝަލް ބީޗު ސަރަހައްދުގައި ހިންގި މާރާމާރީގައި އެންމެ އިސްކޮށް އުޅުނު ބިދޭސީ މީހާ ވަނީ ފުލުހުންގެ އެހީތެރިކަމާއެކު އިމިގްރޭޝަންގެ ބެލުމުގެ ދަށަށް ގެނެވިފައިވާކަމަށެވެ. އަދި އެ މީހާ ޑީޕޯޓުކުރުމުގެ މަސައްކަތް މިހާރު ކުރަމުންދާކަމަށް އިމިގްރޭޝަނުން ބުންޏެވެ.

Advertisement

މާރާމާރީއާ ގުޅޭ އެ ވީޑިއޯ، މީސް މީޑިއާގައި ދައުރުވެފައިވާއިރު އެ ވީޑިއޯއިން ފެންނަ ގޮތުގައި، ބިދޭސީން އެކެއް އަނެކެއް ގައިގައި ތަޅަމުންދިޔައިރު، އަދި ބައެއް މީހުން ތަޅަން މަސައްކަތް ކުރަމުންދިޔައިރު، އެމީހުން ހުއްޓުވުމަށްވެސް ބަޔަކު ދިޔައީ ހަރަކާތްތެރިވަމުންނެވެ. އަދި އެތަނުން ބައެއް ބިދޭސީން ގޮވައިގެން އެ ސަރަހައްދުން ދާމަންޒަރުވެސް ފެނެއެވެ. މާރާމާރީ ހިނގިއިރު އެތަނުގައި ކުޑަކުދިންނާއި ބިދޭސީ އަންހެނުންވެސް ތިއްބެވެ. ކޮންމެ ހުކުރު ދުވަހެއްގެ ހަވީރަކީ އާޓިފިޝަލް ބީޗް ސަރަހައްދަށް ގިނަ އަދަދެއްގެ ދިވެހިންނާއި ބިދޭސީންވެސް ވަގުތު ހޭދަކުރުމަށްދެއެވެ.