މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސަކަށް ތިލަދުން އޮންލައިނުގެ ޙުސައިން ޘަޤީފް މިއަދު އިންތިހާބުކޮށްފިއެވެ.

މީޑިއާ ކައުންސިލުގެ ރައީސަކަށް ޘަޤީފް އިންތިހާބުކޮށްފައިވަނީ، އެމްއެމްސީގެ އައު ދައުރުގެ ރައީސަކު އިންތިހާބުކުރުމަށް ބޭއްވި އިންތިހާބުގައި މިހާރު ނޫހުގެ ޝަނާ މުހައްމަދާ ވާދަކޮށް ވަރަށް ވާދަވެރި ނަތީޖާއަކުންނެވެ. ރައީސަކު ހޮވުމަށް ބޭއްވި އިންތިހާބުގައި ޘަޤީފަށް 8 ވޯޓު ލިބުނުއިރު، ޝަނާއަށް ލިބުނީ 7 ވޯޓެވެ. ޘަޤީފް ވަނީ މީގެ ކުރިން އެމްއެމްސީގެ ނައިބު ރައީސްގެ މަގާމުވެސް ފުރުއްވާފައެވެ.

މީޑިއާ ކައުންސިލަށް ރައީސަކު ހޮވާފައިމިވަނީ ދެވަނަ ފަހަރަށް ވޯޓުނަގައިގެންނެވެ. އެއީ އިއްޔެ ބޭއްވި އިންތިހާބު އެއްވަރުވުމުންނެވެ. މީޑިއާ ކައުންސިލުގެ ނައިބުރައީސަކަށް ހޮވީ އިބްރާހިމް މުހައްމަދެވެ. މީޑިއާ ކައުންސިލަށް އޭނާ އިންތިހާބުވީ އަމިއްލަ ގޮތުންނެވެ.

މީޑިޔާ ކައުންސިލް އެކުލެވިގެންވަނީ މީޑިޔާ އިދާރާތައް ތަމްސީލުކުރާ 8 މެންބަރުންނާއި، ޢާންމުންގެ ތެރެއިން އިންތިޚާބު ކުރެވޭ 7 މެންބަރުންނާއެކު ޖުމްލަ 15 މެންބަރުންގެ މައްޗަށެވެ.