ޑަބްލިންގައި ހުންނަ އިސްރާއީލުގެ އެމްބަސީ ބަންދުކުރިނަމަވެސް، ފަލަސްތީނުގެ ދިފާއުގައި އަޑުއުފުލުން ނުހުއްޓުވޭނެކަމަށް އަޔަލޭންޑުގެ ބޮޑުވަޒީރު ސައިމަން ހެރިސް ވިދާޅުވެއްޖެއެވެ.

އަޔަލޭންޑުން ފަލަސްތީނަށް ތާއީދުކުރާ މައްސަލާގައި އިސްރާއީލްގެ ބޮޑުވަޒީރު ގިޑިއޯން ސާރް ވަނީ އެޤައުމުގައި ހުންނަ އިސްރާއީލްގެ އެމްބަސީ ބަންދުކުރުމަށް ނިންމާފައެވެ. މި މައްސަލާގައި އިސްރާއީލުން ބުނެފައިވަނީ ޔަހޫދީ ދައުލަތް ބަލައިގަތުމަށް އަޔަލޭންޑުން ދެކޮޅު ހެދުމާއި، ޔަހޫދީ ސިފައިން ފަލަސްތީނުގެ ކުޑަކުދިން މަރާކަމަށް އަޔަލޭންޑޫން ގަބޫލުކޮށް އެކަމާ އަޑުއުފުލަމުންދާތީ، އެޤައުމުގައި އިސްރާއީލް އެމްބަސީއެއް ބެހެއްޓުމުގެ މާނައެއް ނެތްކަމަށެވެ.

އެމްބަސީ ބަންދުކުރުމަށް ނިންމުމާ ގުޅިގެން އަޔަލޭންޑުގެ ބޮޑުވަޒީރު ވިދާޅުވެފައިވަނީ، ކޮންމެ ފިޔަވަޅެއް އެޅި ނަމަވެސް ފަލަސްތީނު މައްސަލާގައި އަޔަލޭންޑުން ގެންގުޅެމުންދާ ސިޔާސަތު ބަދަލުކުރުމެއް ނެތްކަމަށެވެ. އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންގެންދާ ނަސްލު ނައްތާލުމުގެ ޖަރީމާތަކުގެ ހެކިތައް ވަރަށް ސާފުކޮން ފެންނަން އެބައޮތްކަމަށާއި، ހާއްސަ ގޮތެއްގައި ކުޑަކުދިންނާ ދެކޮޅަށް އެ ހިންގާ ލާއިންސާނީ އަމަލުތަކަކީ އަޔަލޭންޑަށް ތަހައްމަލު ކުރެވޭވަރަށްވުރެ ބޮޑެތި ކަންކަންކަމަށް ހެރިސް ފާހަގަކުރެއްވިއެވެ. 

އޭނާ ވިދާޅުވީ އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންގެންދާ ކަންކަމަކީ ބައިނަލްއަޤްވާމީ ޤާނޫނުތަކާ މުޅިން ހިލާފަށް ހިންގަމުންގެންދާ ކަންތައްތަކެއް ކަމަށެވެ. އެގޮތުން ފަލަސްތީނު މައްސަލާގައި އަޔަލެންޑުން މިހާތަނަށް ނިންމި ނިންމުންތަކާމެދު ފަހުރުވެރިވެ ވަޑައިގަންނަވާކަމަށް ހެރިސް ވިދާޅުވިއެވެ.

ފަލަސްތީނާއި އިސްރާއީލް މައްސަލާގައި ޔޫރަޕްގެ ޤައުމުތަކުގެ ތެރެއިން އެންމެފުރަތަމަ ފަލަސްތީނުކޮޅަށް އެރި ޤައުމަކީ އަޔަލޭންޑެވެ. އަޔަލޭންޑުން އެންމެ ފުރަތަމަ ފަލަސްތީނު މައްސަލާގައި އެޤައުމާ އެއްކޮޅަށް ވާހަކަދައްކާފައިވަނީ 2021 ވަނަ އަހަރެވެ. އޭގެ ފަހުން ފަލަސްތީނު މައްސަލާގައި އަޔަލޭންޑުން ގެންގުޅެމުން އަންނަ ސިޔާސަތު ބަދަލުނުވާކަން ފާހަގަކޮށްލެވެއެވެ.