ޖަޕާނު ސަރުކާރުން މޯލްޑިވްސް ކޯސްޓް ގާޑުގެ އިންސާނީ އެހީތެރިކަމުގެ މަސައްކަތްތައް ހަރުދަނާކުރުމަށްޓަކައި 7.6 މިލިއަން އެމެރިކާ ޑޮލަރު (ގާތްގަނޑަކަށް 117 މިލިއަން ރުފިޔާގެ) އަގުހުރި ސާމާނުތަކެއް އިއްޔެ ހަދިޔާކޮށްފިއެވެ.

އިއްޔެ ބޭއްވުނު ޚާއްސަ ރަސްމިއްޔާތެއްގައި މި އިކުއިޕްމަންޓްތައް ދިވެހިރާއްޖޭގައި ހުންނަ ޖަޕާނުގެ ސަފީރު ތަކެއުޗި މިދޯރީ ވަނީ ދިވެހިރާއްޖޭގެ ދިފާއީ ވަޒީރު މުޙައްމަދު ޣައްސާން މައުމޫނަށް ޙަވާލުކޮށްދެއްވާފައެވެ.

މި އެހީގެ ދަށުން ހަދިޔާކުރެވުނު ތަކެތީގެ ތެރޭގައި ހިމެނެނީ ކަނޑުމަތީގެ މުވާސަލާތީ ނިޒާމްތައް، ޕްރޮފެޝަނަލް ޑައިވިންގ ގިއަރ، ސާރޗް އެންޑް ރެސްކިއު އިކުއިޕްމަންޓް އަދި އެހެނިހެން އެހީތެރިވާ ސާމާނާއި، ސާމާނު ރައްކާކުރާ ވަސީލަތްތަކެވެ.

Advertisement

މީގެ ތެރޭގައި އިންމާސެޓް ޔުނިޓްތަކާއި، ޖީއެމްޑީއެސްއެސް ކޮންސޯލްތަކާއި، މެރިން އިންފްރާރެޑް ކެމެރާތަކާއި، ޓެޓްރާ މުވާސަލާތީ ވަސީލަތްތަކާއި، ސްޓޭޝަންްޓޭޝަންތައް ހިމެނެއެވެ.

މި އެހީ ދެވިފައިވަނީ 2020 ވަނަ އަހަރުގެ ނޮވެމްބަރު 22 ވަނަ ދުވަހު ޖަޕާނު ސަރުކާރާއި ދިވެހި ސަރުކާރާ ދެމެދު ސޮއިކުރެވުނު އެކްސްޗޭންޖް އޮފް ނޯޓްސްގެ ދަށުންނެވެ.

މި އެއްބަސްވުމަކީ އިޤްތިޞާދީ އަދި އިޖްތިމާޢީ ތަރައްޤީގެ ޕްރޮގްރާމްތަކުގެ ދަށުން 800 މިލިއަން ޖަޕާނީ ޔެން (ގާތްގަނޑަކަށް 7.6 މިލިއަން އެމެރިކާ ޑޮލަރު) ގެ އެހީއެއް ދިނުމަށް ވެވުނު އެއްބަސްވުމެކެވެ.

ޖަޕާނު ސަރުކާރުން އުންމީދުކުރާ ގޮތުގައި މި އިކުއިޕްމަންޓްތަކުގެ ސަބަބުން ރާއްޖޭގެ މުވާސަލާތީ ނިޒާމް ފުޅާވެ، ކޯސްޓް ގާޑަށް އެމީހުންގެ އޮޕަރޭޝަންތައް އިތުރަށް ހަރުދަނާކަމާއި ފުރިހަމަކަމާއެކު ވިލަރެސްކުރެވޭނެއެވެ.

އަދި މިކަމުގެ ސަބަބުން ދިވެހިރާއްޖެއާއި ޖަޕާނާ ދެމެދު އޮންނަ ދެފަރާތުގެ ގުޅުން އިތުރަށް ބަދަހިވެގެންދާނެ ކަމަށްވެސް ޖަޕާނު ސަރުކާރުން ބަޔާންކޮށްފައިވެއެވެ.