އައްޑޫ ސިޓީން މާލެއަށް ދަތުރުކުރަމުންދިޔަ ސީމެކްސް އުޅަނދުގައި ފަޅުވެރިއެއްގެ ގޮތުގައި މަސައްކަތްކުރާ މީހެއް ގެއްލިއްޖެއެވެ.
ގެއްލިފައިވަނީ، ނޭޕާލް ރައްޔިތެއް ކަމަށްވާ ރާޖް ކުމާރެވެ.
ފުލުހުން ބުނި ގޮތުގައި، އޭނާ ގެއްލިފައިވާ ކަމުގެ މަޢުލޫމާތު ރޭގެ ވަގުތެއްގައި ފުލުހުންނަށް ރިޕޯޓްކޮށްފައިވެއެވެ.
އަދި ރާޖް ކުމާރު އުޅަނދުގައި ނެތްކަން އެނގިފައިވަނީ އައްޑޫ ސިޓީއާއި ފުވައްމުލައް ސިޓީއާ ދެމެދު ކަނޑުމަތިން، ފުވައްމުލައް ސިޓީއާ 8 މޭލަށް ކައިރިވެފައިވަނިކޮށް ކަމަށް މަޢުލޫމާތު ލިބިފައިވާ ކަމަށް ފުލުހުން ބުންޏެވެ.
"ބޯޓު އައްޑޫ ސިޓީގައި ރޭ 11:30 އެހައިކަންހާއިރު ފުރި އިރު ރާޖް ކުމާރު ބޯޓުގައި ހުރި. އަދި ރޭ 01:15 ހާއިރު ކެޕްޓަނާ ވާހަކަ ދެއްކިކަން މިހާތަނަށް ލިބިފައިވާ މަޢުލޫމާތުން އެނގޭ" ފުލުހުން ބުންޏެވެ.
ރާޖް ކުމާރު ހޯދުމުގެ މަސައްކަތް އެމްއެންޑީއެފްއިން ކުރަމުންދާއިރު، އޭނާ ގެއްލިފައިވާ މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.
Advertisement
This content is created and paid for by advertisers and does not involve Voice Journalists
