ޗައިނާ ޓެލެކޮމްގެ އެމެރިކާ ވިޔަފާރިތަކާ ދެކޮޅަށް އެމެރިކާއިން އަނެއްކާވެސް ހަރުކަށި ފިޔަވަޅުތަކެއް އަޅަން ތައްޔާރުވެއްޖެއެވެ.
ގައުމީ ސަލާމަތަށް ނުރައްކަލެއްކަމަށް ބުނެ ޗައިނާ ޓެލެކޮމްއިން އެމެރިކާގައި މުވާސަލާތީ ޚިދުމަތްތައް ދިނުން 2021 ވަނަ އަހަރު އެމެރިކާއިން ވަނީ މަނާކޮށްފައެވެ. އެމެރިކާގެ ޓެލެކޮމް ވިއުގަތަކަށް ދާދިފަހުން ދިން ސައިބަރ ހަމަލާގެ ފަހަތުގައިވެސް ވަނީ ޗައިނާކަމަށް އެމެރިކާއިން ތުހުމަތުކުރެއެވެ. އެހެންނަމަވެސް ޗައިނާއިން މި ތުހުމަތުތައް ދޮގުކުރެއެވެ.
އާއްމު މުވާސަލާތީ ޚިދުމަތްތައް ދިނުން މަނާކޮށްފައިވީނަމަވެސް، ޗައިނާ ޓެލެކޮމްއާއި ޗައިނާގެ އެހެން ކުންފުނިތަކަށް އިންޓަނެޓާއި ގުޅުން ހުރި އެހެން ބައެއް ޚިދުމަތްތައް އެމެރިކާގެ ކުންފުނިތަކަށާއި އާއްމުންނަށް ފޯރުކޮށްދިނުމުގެ ފުރުސަތު އަދި އޮތީ ހުޅުވާލެވިފައެވެ. މިކަމަކީ އެމެރިކާގެ ގާނޫނު ހަދާ މަޖިލީހުގެ މެމްބަރުން އެކަމާމެދު ނުހަނު ކަންބޮޑުވާ ކަމެކެވެ.
ޗައިނާ ޓެލެކޮމްގެ އިތުރުން ޗައިނާ މޮބައިލްއާއި ޗައިނާ ޔުނިކޮމްއަށްވެސް އެމެރިކާގައި މުވާސަލާތީ ޚިދުމަތްތައް ދިނުން އެމެރިކާއިން ވަނީ މަނާކޮށްފައެވެ. ޗައިނާ ޔުނިކޮމް ކުންފުނި އެމެރިކާގައި ހަރަކާތްތެރިވުން މަނާކުރީ 2022 ވަނަ އަހަރުއެވެ. އަދި އެމެރިކާގައި މުވާސަލަތީ ޚިދުމަތްތައް ދިނުމަށް ޗައިނާ މިބައިލްއިން 2019 ވަނަ އަހަރު ހުށަހެޅުމުން ފެޑެރަލް ކޮމިއުނިކޭޝަންސް ކޮމިޝަނުން ވަނީ އެކަމަށް އިންކާރުކޮށްފައެވެ.
އަލުން އަނެއްކާ މިކުންފުނިތަކާ ދެކޮޅަށް އެމެރިކާއިން މި ތެދުވަނީ ޗައިނާގެ ކުންފުނިތަކަށް މިހާރުވެސް އޮތް ހަނި ފުރުސަތުގެ ތެރެއިން އެމެރިކާގެ ގައުމީ ސަލާމަތަށް ނުރައްކާ އޮވެދާނެކަމަށް ބުނެއެވެ.
Advertisement
This content is created and paid for by advertisers and does not involve Voice Journalists
