ނޮވެންބަރު 5 އިން 7 އަށް ލަންޑަންގައި ބޭއްވި ވާލްޑް ޓުއަރިޒަމް މާރކެޓްގައި އައްޑޫ ސިޓީ ތަމްސީލުކުރުމަށްޓަކައި އައްޑޫ ސިޓީކައުންސިލުން ކުރި ދަތުރަށް 700،000 ރުފިޔާ އަށް ވުރެ ބޮޑު ހޭދައެއްކޮށްފައިވާކަން ހާމަވެއްޖެ އެވެ.

މި ދަތުރުގައި ބައިވެރިވީ އައްޑޫ މޭޔަރު އަލީ ނިޒާރުއާއި، ހަތަރު ކައުންސިލަރަކާއި ކައުންސިލް އެގްޒެކެޓިވްއަކާއި ކައުންސިލް އޮފިސަރަކާއި ޕަބްލިކް ރިލޭޝަންސް އޮފިސަރު އަދި ޓެކްނިކަލް އެކްސްޕާޓެއް ކަމަށް  އެކައުންސިލުން ބުނެފައިވެ އެވެ.

މި ދަތުރާއިގުޅިގެން ގިނަ އަޑުތަކެއް މީގެ ކުރިންވެސް ފެތުރިފައިވާއިރު، ދަތުރުގައި ބައިވެރިވި ކޮންމެ މީހަކަށް ޕޮކެޓް މަނީގެ ގޮތުގައި 51،000 ދިން ކަމަށްވެސް ވާހަކަ ދެކެވުނެވެ. އަދި ދަތުރުގެ ގިނަ ޚަރަދު ކުރީ ކައުންސިލް ބަޖެޓުން ކަމަށްވެސް ބައެއް ފަރާތްތަކުން ރިޕޯޓް ކޮށްފައިވެއެވެ.

Advertisement

މި ދަތުރަށް ކައުންސިލުން ކުރި ހަރަދުތައް ހޯދަން އޮންލައިން ނޫހަކުން އެދުމުން އެ ނޫހާ ހިއްސާކުރި މައުލޫމާތުތަކުން އެނގޭ ގޮތުގައި ނޮވެމްބަރު 2 އިން 11 އަށް ލަންޑަނަށް ކުރި ދަތުރަށް 700،000ރ. އަށްވުރެ ބޮޑު ހޭދައެއް ވަނީ ކޮށްފައެވެ.

ޚަރަދުގެ ތަފްސީލް؛

* ކައުންސިލްގެ ބަޖެޓުން 528،027ރ.

* ޓްރަސްޓް ފަންޑުން 196،111ރ.

* މުޅި ޖުމްލަ 724،138ރ.

މި ދަތުރަށް ދިއުމުގެ ކުރިން އައްޑޫ ސިޓީ ކައުންސިލުންވަނީ "އައްޑޫ - ބިޔޮންޑް އީކުއޭޓަރ" ގެ ނަމުގައި ލޯގޯއެއް ތައްޔާރުކޮށް ޢާޢްމުކޮށްފައެވެ.
އަދި އައްޑޫގެ ފަތުރުވެރިކަން ޑަބްލިއުޓީއެމްގައި އިޝްތިހާރު ކުރީވެސް މި ބްރޭންޑްގެ ނަމުގަ އެވެ.

މިއީ ޑަބްލިއުޓީއެމްގައި އައްޑޫގެ ފަތުރުވެރިކަމަށް ހާއްސަކޮށްގެން އިޝްތިހާރު ކުރުމުގެ ހަރަަކާތްތަކެއް ހިންގި ފުރަތަމަ ފަހަރެވެ.