މިފަހުން އެއްދުވަހަކާ އެންމެގިނަ ފަތުރުވެރިން ޒިޔާރަތްކޮށްފައިވަނީ މިދިޔަ އާދިއްތަ ދުވަހުކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން ނެރެ އާއްމުކޮށްފައިވާ ރާއްޖެއަށް ޒިޔާރަތްކުރި ފަތުރުވެރިންގެ ތަފާސްހިސާބަށް ބަލާއިރު، މިދިޔަ އާދިއްތަ ދުވަހު ރާއްޖެއަށް ވަނީ 8،934 ފަތުރުވެރިން ޒިޔާރަތްކޮށްފައެވެ. މިއީ މި ފަހަކަށް އައިސް އެއްދުވަހަކާ މިހާ ގިނަ އަދަދަކަށް ފަތުރުވެރިން ޒިޔާރަތްކުރި ފަހަރެވެ. މިހަފްތާ ފެށުނުއިރު ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އުޅެނީ ފަސްހާހުން މަތީގައެވެ.

ތަފާސްހިސާބުތަކަށް ބަލާއިރު، މިމަހުގެ 17 ވަނަ ދުވަހުގެ ނިޔަލަށް ރާއްޖެއަށް 1,941,195 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު، 8.8 އިންސައްތަ އިތުރުވުމެކެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު އުޅެނީ 1,784,499 ގައެވެ. ރާއްޖެއަށް ޒިޔާރަތްކުރާ ފަތުރުވެރިން ޖުމްލަގޮތެއްގައި މިހާރު ރާއްޖޭގައި 7.7 ދުވަހު މަޑުކުރެއެވެ.

ސަރުކާރުން ވަނީ މިއަހަރުގެ ތެރެގައި ރާއްޖެއަށް 2 މިލިއަން ފަތުރުވެރިން ޒިޔާރަތްކުރާނޭކަމަށް ލަފާކޮށްފައެވެ. ސަރުކާރުގެ އަމާޒަށް ވާސިލްވާނީ އަދި 58،805 ފަތުރުވެރިން ޒިޔާރަތްކޮށްގެންނެވެ. އަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ޤައުމުތަކުގެ ތެރޭގައި ހިމެނެނީ، ޗައިނާ، ރަޝިއާ، އިނގިރޭސިވިލާތް، ޖަރުމަނުވިލާތް އަދި އިޓަލީވިލާތެވެ.