އިންޑިއާގެ އަދާނީ ގްރޫޕުން އެހެން ގައުމުތަކުގައި ކުރާ ނުވަތަ ކުރި ކަމަކާމެދު ސްރީލަންކާގެ ޝައުގުވެރިކަމެއް ނެތްކަމަށާއި، ޝައުގުވެރިކަން ހުރީ އެކުންފުނީގެ ލަންކާގެ އިންވެސްޓްމަންޓަކާމެދު ކަމަށް ލަންކާގެ ރައީސް އަނޫރަ ކުމާރަ ޑިސަނަޔަކަ ވިދާޅުވެއްޖެއެވެ.
އިންޑިއާއަށް ކުރެއްވި ރަސްމީ ދަތުރުފުޅުގައި އިންޑިއާގެ އިކޮނޮމިކް ޓައިމްސްއާ ވާހަކަ ދައްކަވަމުން ޑިސަނަޔަކަ ވިދާޅުވީ ލަންކާއިން ބަލާނީ އަދާނީ ގްރޫޕުން ލަންކާގައި މަސައްކަތްކުރީ އަދި ކުރަން ވިސްނަނީ ކިހިނެއްތޯ ކަމަށެވެ. އަދި އެކުންފުނީގެ ތަސައްވުރަކީ ލަންކާއަށް ފައިދާކުރާނެ ތަސައްވުރެއްނަމަ، އެކުންފުންޏާއިއެކު މަސައްކަތްކުރާނެކަމަށެވެ.
އަދާނީ ގްރޫޕުން އިންޑިއާގައި ޕްރޮޖެކްޓްތައް ހޯދުމަށް އިންޑިއާ ސަރުކާރަށް ރިޝްވަތުދޭކަމަށް ބުނެ އެކުންފުނީގެ ވެރިޔާ ގައުތަމް އަދާނީއާއި ކުންފުނީގެ ބައެއް އިސްވެރިންގެ މައްސަލަ ބަލަން އެމެރިކާއިން ވަނީ ފަށާފައެވެ. އެއާއެކު ލަންކާގައި އަދާނީ ކުންފުނިން ހިންގަން ތައްޔާރުވަމުން އަންނަ ބޮޑު 2 ޕްރޮޖެކްޓެއްގައި ގޯހެއް އުޅޭތޯ ބަލާނެކަމަށް ލަންކާއިން ވަނީ ބުނެފައެވެ. ލަންކާގައި ވައިން ހަކަތަ އުފައްދާ 2 ޕްލާންޓަކަށް 442 މިލިއަން އެމެރިކާ ޑޮލަރު އަދި ކޮލޮމްބޯ ޕޯޓްގެ ޓަރމިނަލްއަކަށް 553 މިލިއަން ޑޮލަރު އިންވެސްޓްކުރުމަށް އަދާނީއިން ދަނީ ތައްޔާރުވަމުންނެވެ.
ވެރިކަމަށް ވަޑައިގަތުމަށްފަހު ޑިސަނަޔަކަ އެންމެ ފުރަތަމަ ރަސްމީ ދަތުރުފުޅެއް މިކުރެއްވީ އިންޑިއާއަށެވެ. އަދި އަންނަ ޖެނުއަރީ މަހު ޗައިނާއަށް ވަޑައިގަންނަވާނެއެވެ.
Advertisement
This content is created and paid for by advertisers and does not involve Voice Journalists
