އިބްރާހިމް މުހައްމަދު ސޯލިހްގެ ސަރުކާރުގެ ހައުސިން މިނިސްޓްރީގެ ސްޓޭޓް މިނިސްޓަރުގެ މަޤާމު އަދާކުރެއްވި އަކްރަމް ކަމާލުއްދީންއާ އިތުރު ހަތަރު މީހެއްގެ ޕާސްޕޯޓްވެސް ހިފަހައްޓައިފި އެވެ.

އެ މައްސަލާގައި، އަކްރަމްގެ އިތުރުން ޕާސްޕޯޓް ހިފަހައްޓާފައިވަނީ ކުރީގެ ސީނިއާ އެގްޒެކެޓިވް މުހައްމަދު އާރިފްއާ، ކުރީގެ ސީނިއާ އެގްޒެކެޓިވް ޑިރެކްޓަރު ލިރުގާމް ވަހީދުއާ، ޑިރެކްޓާ ޖެނެރަލް އަހްމަދު ވިޝާން ނަސީމްގެ އެވެ.

އެ އެންމެންގެ ޕާސްޕޯޓްވެސް ހިފަހައްޓާފައި ވަނީ ބިންވެރިޔާ ސްކީމްގެ ދަށުން ގޯތި ލިބެން ނުޖެހޭ ބަޔަކަށް ގޯތި ދިން މައްސަލައާއި ގުޅިގެންނެވެ. އަދި އެ މީހުންގެ ޕާސްޕޯޓް ހިފެހެއްޓީ އޭސީސީގެ ތަހުޤީޤްގެ ބޭނުމަށެވެ.

އަކްރަމް އާއި ކުރީ ސަރުކާރުގެ ހައުސިންގެ މިނިސްޓްރީގެ އިސް ބައެއް ބޭފުޅުންގެ ޕާސްޕޯޓް ހިފަހައްޓާފައި ވާއިރު، އިއްޔެ ފުލުހުން ބޭއްވި ނޫސްވެރިންގެ ބައްދަލުވުމުގައި، ގޯތި ހިޔާނާތުގެ މައްސަލާގައި ބަޔާން ނެގި މީހުންނަށް ލިޔުންދިނީ އެ ސަރުކާރުގައި ކަމަށް އެ ބަޔާންނެގި ފަރާތްތަކުން ބުނެފައިވާ ކަމަށް ފުލުހުން މައުލޫމާތުދީފައިވެއެވެ. އެގޮތުން ފަޒުލްގެ ބޭބެ، ފަޒީލްވެސް އަކްރަމްއާ ބައްދަލުވިކަމަށް ތަހުޤީޤްގައި މައުލޫމާތުދީފައިވާކަމަށް ފުލުހުން ބުންޏެވެ.

އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދުގެ އެއްބަނޑު އެއްބަފާ ބޭބެ އަދި އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރ ފަޒީލް ރަޝީދު ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައިގެ ޖިނާޢީ ތަހުގީގެއް ފުލުހުން ވަނީ ފަށާފައެވެ.

އެއާއެކު މިހާރުވަނީ، އެ މައްސަލާގައި އެންމެ ބޮޑަށް ތުހުމަތުވާ މީހުންގެ ތެރޭގައި ހިމެނޭ ފަޒުލް ރަޝީދާއި، ފަޒީލް ރަޝީދު ހިމެނޭހެން، ހައުސިން މިނިސްޓްރީއާ، އެޗްޑީސީގެ ގިނަ ވެރިންތަކެއްގެ ޕާސްޕޯޓްވެސް ހިފަހައްޓާފައިވެ އެވެ.