ރާއްޖޭގައި ފުޅާދާއިރާއެއްގައި ހަށިވިއްކަމުންދިޔަ ބިދޭސީންތަކެއް އަތުލައިގަނެފިއެވެ.
އިމިގްރޭޝަނުން ބުނީ، މި މީހުން އަތުލައިގަނެފައިވަނީ، ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިއަ ބިދޭސީން ހޯދުމަށް އެ އޮތޯރިޓީ އާއި ފުލުހުން ގުޅިގެން ހިންގި ހާއްސަ އޮޕަރޭޝަނެއްގެ ދަށުން ކަމަށެވެ. މި އޮޕަރޭޝަނުގައި ބިދޭސީ 7 އަންހެނަކާއި އެޖެންޓުންގެ ގޮތުގައި މަސައްކަތް ކުރަމުންދިއަ ބިދޭސީ ދެ ފިރިހެނަކު ވަނީ އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.
އިމިގްރޭޝަނުން ބުނީ މި މައްސަލަ ތަހުގީގުކުރުމަށްފަހު، އަނބުރާ ނާދެވޭ ގޮތަށް މީގެތެރެއިން ތިން އަންހެނަކު ޑީޕޯޓުކޮށްފައިވާކަމަށެވެ. މީގެ އިތުރުން އަނެއް 6 ބިދޭސީން ޑީޕޯޓުކުރުމުގެ މަސައްކަތް ދަނީ ކުރަމުންދާކަމަށް އިމިގްރޭޝަނުން ބުނެއެވެ.
އިމިގްރޭޝަނުން ގެންދަނީ ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީން ހޯދުމަށް ސަރުކާރުގެ ކަމާބެހޭ ފަރާތްތައް ގުޅިގެން ހާއްސަ އޮޕަރޭޝަނެއް ހިންގަމުންނެވެ. މި އޮޕަރޭޝަން އަތޮޅުތެރޭގެ ރަށްތަކަށްވެސް ވަނީ ފުޅާކޮށްފައެވެ.
Advertisement
This content is created and paid for by advertisers and does not involve Voice Journalists
